Dımash Qudaıbergen Almatydaǵy mýzeıge atasynyń dombyrasyn syıǵa tartty

ALMATY. KAZINFORM – 2026 jylǵy 18 aqpanda Almatydaǵy Yqylas atyndaǵy halyq mýzykalyq aspaptar mýzeıinde ótken «Dımash: bir daýys – myń el» kórmesiniń ashylýynda ánshi Dımash Qudaıbergen mýzeı qoryna óziniń jeke dombyralaryn tabystady.

Mýzeıdiń baspasóz qyzmetiniń habarlaýynsha, olardyń biri – bala kúninde atasy syıǵa bergen, shyǵarmashylyq jolyna serik bolǵan qasterli dombyrasy, ekinshisi – ánshiniń qoltańbasy qoıylǵan aspap.

– Bul aspaptar biz úshin óte ystyq. Sebebi bul – álemniń ár túkpirinen jınalǵan, túrli halyqtyń ulttyq murasyn tanytatyn qundy dúnıeler. Árqaısysynyń ózindik tarıhy bar. Osy aspaptardy tartý etken barsha azamatqa alǵysymyz sheksiz, – dedi Dımash Qudaıbergenniń anasy, Qazaqstan Respýblıkasynyń Eńbek sińirgen qaıratkeri Svetlana Aıtbaeva.

Kórme Almaty mýzeıler birlestiginiń uıymdastyrýymen ótti. Saltanatty rásimge Qazaqstan jáne Qyrǵyz Respýblıkasynyń Halyq ártisi Dımash Qudaıbergen arnaıy qatysyp, kórmeni ózi ashyp berdi.

Ekspozıtsııaǵa ánshiniń jeke qorynan 70 mýzykalyq aspap qoıylǵan. Olardyń qatarynda álemniń túkpir-túkpirinen jankúıerleri tartý etken ulttyq aspaptar bar. Sonymen birge sahnalyq kostıýmderi de usynyldy. Ásirese, Maıkl Djeksonniń jeke stılısi Goko Zaldı arnaıy ázirlegen sahnalyq kıim kórermenderdiń nazaryn aýdardy.

Al mýzeı dırektory Lázzat Qudaıbergenqyzy Dımash Qudaıbergenge Abaı Qunanbaıulynyń dombyrasynyń dál kóshirmesin syıǵa tartty.

Kórme bir aı boıy Almaty qalasy, Zenkov kóshesi, 24a mekenjaıyndaǵy Yqylas atyndaǵy halyq mýzykalyq aspaptar mýzeıinde jalǵasady.

Eske salaıyq, buǵan deıin Dımash Qudaıbergen Qysqy Olımpıada oıyndarynyń chempıony Mıhaıl Shaıdorovqa kólik syılaǵanyn jazǵan edik.

Ánshi sportshyǵa Olımpıadada óziniń oryndaýyndaǵy ándi tańdaǵany úshin de alǵys aıtty.