Dımash Qudaıbergen alǵash ret qaryndasymen birge óner kórsetti

ASTANA. QazAqparat - Búgin Elbasymyz Nursultan Nazarbaevtyń qatysýymen ótken Qazaqstan halqy Assambleıasy kontsertinde Dımash Qudaıbergen qaryndasy Raýshanmen birge sahnaǵa shyqty, dep habarlaıdy QazAqparat.

«Dostarym, ónerimizdiń aspanyna taǵy bir juldyz jarqyrap shyqty! Búgin Elbasymyz Nursultan Nazarbaevtyń qatysýymen ótken Qazaqstan halqy Assambleıasy kontsertinde Dımash Qudaıbergen qaryndasy Raýshanmen sahnaǵa shyqty. Dýet Selın Dıonnyń All by Myself hıtyn oryndap, tyńdarmandardyń kóńilinen shyqty. Naǵyz tabıǵı daryn, bravo! Raýshandy sahnadaǵy tuńǵysh qadamymen quttyqtap, aq jol tileımin!», - dep jazady Mádenıet jáne sport mınıstri Arystanbek Muhamedıuly óziniń paraqshasynda.

Eske salaıyq, Dımash Qudaıbergen ótken jyly Qytaıdyń «Singer2017» án baıqaýyna qatysyp 2-oryndy jeńip aldy. Sondaı-aq, otandasymyzdyń erekshe daýysy qytaılyq tyńdarmandardyń júregin jaýlap, az ýaqytta sol eldegi eń tanymal ánshige aınaldy.