Dımash Qudaıbergenge Іzgi nıet elshisi belgisi tabystaldy

ASTANA. KAZINFORM – Senat Tóraǵasy Máýlen Áshimbaev Álemdik jáne dástúrli dinder kóshbasshylary seziniń Іzgi nıet elshisimen kezdesti. Bul týraly Senattyń baspasóz qyzmeti málim etti. 

Máýlen Áshimbaev Dımash Qudaıbergen óziniń shyǵarmashylyǵymen qazaqtyń ulttyq mádenıetin dáripteýge úlken úles qosyp kele jatqanyn atap ótti. Palata Spıkeri ánshiniń óner arqyly beıbitshilik pen izgilik ıdeıalaryn nasıhattaýǵa jáne halyqtar men mádenıetter arasyndaǵy dıalogty nyǵaıtýǵa tıgizip otyrǵan yqpalyna nazar aýdaryp, bul asa mańyzdy mıssııa ekenin aıtty. Sondaı-aq ol atalǵan qundylyqtar Álemdik jáne dástúrli dinder kóshbasshylary seziniń qaǵıdattarymen úndes ekenin tilge etti.

– Prezıdentimiz Qasym-Jomart Kemeluly Toqaev dinaralyq jáne órkenıetaralyq dıalog máselelerine únemi basa mán berip keledi. Qazirgi tańda búkil álem buryn-sońdy bolmaǵan jahandyq syn-qaterlermen betpe-bet kelip otyr. Osyndaı jaǵdaıda rýhanı dıplomatııanyń mańyzy burynǵydan da arta túskeni anyq. Sondyqtan beıbitshilik pen dıalog mádenıetin dáripteý asa mańyzdy. Bul rette dinı, saıası jáne qoǵamdyq kóshbasshylardyń birlesken kúsh-jigeri aıryqsha mánge ıe. Osy baǵytta Álemdik jáne dástúrli dinder kóshbasshylary Seziniń Іzgi nıet elshileri mańyzdy ról atqarady. Siz aldaǵy ýaqytta da ózińizdiń shyǵarmashylyǵyńyzben jáne kreatıvti jobalaryńyzben beıbitshilik pen kelisim ıdeıalaryn halyqaralyq deńgeıde ilgeriletýge zor úlesińizdi qosa beresiz dep senemin, – dep, Máýlen Áshimbaev Dımash Qudaıbergenge Sezdiń Іzgi nıet elshisi tósbelgisin tabys etti.

Kezdesýde Álemdik jáne dástúrli dinder kóshbasshylarynyń VIII sezi men Jas dinı lıderlerdiń II forýmyna daıyndyq barysy, Sezd tujyrymdamasyn iske asyrý máseleleri jáne osy baǵyttaǵy birlesken jobalar talqylandy.

Aıta keteıik, «Dinder dıalogy: bolashaq jolyndaǵy sınergııa» taqyrybyna arnalatyn Álemdik jáne dástúrli dinder kóshbasshylarynyń VIII sezi 2025 jylǵy 17-18 qyrkúıekte Astanada ótedi.

Buǵan deıin Dımash Qudaıbergen Dinder seziniń Іzgi nıet elshisi bolyp taǵaıyndalǵanyn jazǵan bolatynbyz. 

Eske sala keteıik, jýyrda áıgili Rolling Stone jýrnaly Dımashtyń halyqaralyq bedeldi syılyqty qalaı alǵanyn jazǵan bolatyn.