Dımash Qudaıbergen álemdik deńgeıdegi qaı ánshimen dýet aıtqysy keledi

NUR-SULTAN. QazAqparat - Otandyq ánshi álemge tanymal qaı ánshimen birge óner kórsetkisi keletinin aıtty, dep habarlaıdy QazAqparat tilshisi.

«Meniń bala kezden kele jatqan bir armanym bar, ol - amerıkalyq álemge tanymal ánshi Selın Dıonmen bir sahnada óner kórsetip, birge án aıtý», - dedi D. Qudaıbergen.

Sondaı-aq, ánshi kúnine qansha ýaqytyn áleýmettik jelige jumsaıtyny jóninde de tilge tıek etti.

«Shetelde jıi bolatyndyqtan, Qazaqstandaǵy oqıǵalardan habardar bolý úshin áleýmettik jelilerge kirip turamyn. Áıtpese, arnaıy ýaqyt bólip otyramyn dep aıta almaımyn. Sol, kúnine 1 saǵat ýaqyt jetkilikti» , - dedi ol.

Odan bólek, jas ánshi bir kúnnen keıin ótetin kontsertiniń daıyndyq barysy týraly sóz etti.

«Shynymdy aıtsam, maǵan shetelde kontsert berý ońaılaý. Sebebi, óz elimizdegi kontsert ata-anam men jaqyndarymnyń, ustazdarymnyń qatysýymen ótedi. Men ol kisilerdiń ýaıymyn sezip otyramyn. Jáne olardyń maǵan artqan úmitin durys aqtaı alamyn ba degen qobaljý bolady», - deıdi D.Qudaıbergen.

Buǵan deıin habarlaǵanymyzdaı, jas ánshi jeke kontsertinde kóptegen jańa týyndylardyń oryndalatynyn málim etken bolatyn.