Dımash Qudaıbergen 23 jasqa toldy
ASTANA. QazAqparat - Búgin qazaqtyń atyn aıdaı álemge tanytqan talantty ánshi, otandasymyz Dinmuhammed Qanatuly Qudaıbergenniń týǵan kúni.
Dımash 1994 jyly Aqtóbede tanymal ánshiler, Qazaqstan Respýblıkasynyń mádenıet qaıratkerleri - Svetlana jáne Qanat Aıtbaevtardyń shańyraǵynda dúnıe esigin ashty. Dımashtyń ata-ájesi de ánge áýes, mýzykaǵa jaqyn adamdar. Biri dombyrada oınasa, ekinshisiniń án aıtýǵa beıim.
Ánshi bala kúninen kıeli sahnaǵa qumar bolǵan. 5 jasynan bastap fortepıanoda oınaýdy úırenedi. Balalar horynda án aıtady. Alty jasynda "Aınalaıyn" respýblıkalyq baıqaýynyń "Fortepıano" nomınatsııasynda jeńimpaz atanady. Bul balǵyn bala shaǵynda baǵyndyrǵan bir bıik belesi edi. Odan soń jas talant qııandarǵa qanat qaǵady. Respýblıkalyq, tipti halyqaralyq dodalarda eliniń atyn asqaqtatyp, álemge pash etýden talmaıdy.
2010 jyly "Baıqońyrdyń ásem daýystary" halyqaralyq festıvaliniń laýreaty atandy. 2012 jyly "Jas qanat" respýblıkalyq jas án oryndaýshylar baıqaýynyń gran-prıin jeńip alady. 2012 jyly "Vostochnyı bazar" halyqaralyq baıqaýynda taǵy da bas júldeni qanjyǵalady. Bir jyldan soń "Meıkın Azııa" І halyqaralyq festıvaliniń jeńimpazy atandy.
2014 jyly Dımash Aqtóbe qalasyndaǵy A.Jubanov atyndaǵy mýzykalyq kolledjiniń "Akademııalyq án oryndaý" fakýltetin bitirip, Qazaq ulttyq óner ýnıversıtetiniń "Estrada óneri" fakýltetine tústi. Bul kezde jas ánshini ónerge jaqyn jandar men ánshiler, óziniń jerlesteri ǵana jaqsy bilse kerek. Al jalpaq jurt áli Dımashty tolyq tanyp kete qoımaǵan. Ánshiniń esimi dúıim elge Vıtebsk qalasynda ótken XXIV Halyqaralyq «Slavıan bazary-2015» baıqaýynda gran-prıdi jeńip alǵan soń máshhúr bola tústi. Al naǵyz tanymaldyqty oǵan Qytaıda ótken «I am singer» jobasy syılady.
Kil myqtylar bas qosqan bul joba bastalysymen-aq Dımash maıtalman mamandar nazaryna ilikti. Alǵashqy saıys kúni Danıel Balavýannyń "SOS d'un terrien en detresse" ánin óte joǵary deńgeıde oryndap, kórermender kózaıymyna aınaldy. Tipti, joba mamandary "Táńir ózi nazaryna alǵan jas ánshi" dep joǵary baǵa berdi. Odan keıingi kezeńderde ataqty «Opera-2» ánin Vıtastan 2 ton jońǵary oryndap, búkil qytaı halqyn «botadaı bozdatty». Onyń jankúıerleri kún sanap, saǵat sanap kóbeıip jatty. Ánshini fanattary kúni-túni ańdyp, ol mingen ushaq reısterine bılet satyp alýdy shyǵardy. Ony áýejaıdan bir kórip qalýdyń ózin sheksiz baqytqa balaıtyndar qaptady. Osy sekildi jaǵdaılar kóbeıgen soń ol qonaqúıin jıi-jıi aýystyryp otyrýǵa májbúl bolady. Alaıda, jankúıerlermen kezdese qalǵan jaǵdaıda bárine qoltańba úlestirip, sýretke túsip, jyly shyraı tanytýdan qashpaıdy. Buryn-sońdy qazaq ánshilerinen osyndaı tanymaldylyqqa jetken, osynsha halyqty talantyna tabyndyrǵany bolmaǵan edi. Tipti, álemge tańdaı qaqtyrǵan Lara Fabıan syndy kúmis kómeı ánshiniń ózi qazaqstandyq jas talantpen kezdesýge qumar ekendigin áleýmettik jelide jazdy. Bul tek Dımashtyń ómirindegi emes, tutas qazaq estradasynyń tarıhyndaǵy jarqyn sátter edi.
15 sáýir kúni «I am singer» jobasy márege jetip, Dımash Qudaıbergen 2-shi oryn aldy. Bul jas ánshi úshin úlken jetistik edi, sebebi kil myqtylar synǵa túsken bul jobanyń talaby da, deńgeıi de joǵary bolatyn.
Mine, osylaı el dańqyn aspandatqan daýylpaz ánshi, búgingi zamannyń Ámiresi 23 jasqa tolyp jatyr. Halyqtyń súıispenshiligine bólengen ánshige árdaıym aq jol tileımiz!
