Dımash qytaılyq CGTN telearnasynyń «Ideıalar ózgeris ákeledi» jobasyna qatysty
ALMATY. KAZINFORM — QHR Tóraǵasynyń Qazaqstanǵa memlekettik sapary qarsańynda «Ideıalar ózgeris ákeledi» baǵdarlamasynda qazaq-qytaı dostyǵyn damytýǵa zor úles qosqan tulǵalar qonaq boldy. Túsirilim Almaty qalasynda ótti. Bul jaıynda Dimashnews habarlady.
Jobanyń bas keıipkeri Dımash Qytaıdaǵy kóktem festıvalinde alǵash óner kórsetken kezde basynan ótken jaǵdaılardy aıtyp berdi.
«Eń tanymal performansym retinde esimde máńgi qalyp ketti. 2018 jyly dostarym Tıa Reı jáne Sıao Tszıntenmen birge óner kórsetý qurmetine ıe boldym. Biz qytaı tilinde án aıttyq. Qatty ýaıymdaǵanym esimde. Árıne, sahnanyń aldynda qobaljý, jaýapkershilikti seziný — qalypty jaǵdaı. Soǵan qaramastan ol kesh kóńildi jáne tamasha ótti! Dál osy sát maǵan Qytaıdaǵy fanattar sanyn kóbeıtýge kómektesti. Al I am a Singer shoýyna qatysqannan keıin Qytaıda ǵana emes, búkil álemde úlken kontsertterde óner kórsete bastadym», — deıdi oryndaýshy.
Ol Qytaı halqyna 22 jastaǵy Dımashty álemge kórsetip, tanytqany úshin sheksiz rıza.
«Moıyndaýym kerek, osydan keıin meniń ónerdegi tasym órge domalaı bastady. Jalpy qytaı kórermenderi meniń júregimde erekshe oryn alady. Qytaıǵa qansha barsam da, qansha ret óner kórsetsem de, olardyń maǵan degen syı-qurmeti men mahabbaty meni tańqaldyrady. Solardyń arqasynda shabyttanyp, jumys istep, eńbektenýge eki ese talpyna bastaımyn», — deıdi Dımash.
Dımash Qytaı Halyq Respýblıkasynyń Tóraǵasy Sı Tszınpın myrzamen alǵashqy kezdesýi jáne Sıan qalasynda ótken «Ortalyq Azııa-Qytaı» sammıtinde sóılegen sózi týraly esteligin bólisti.
«Bir-eki apta buryn qońyraý shalyp, kontsertke shaqyrdy. Osy shaqyrýdy qabyldaǵanyma óte qýanyshtymyn. Eger meniń jumysym elder arasyndaǵy dıplomatııalyq qarym-qatynastyń nyǵaıýyna qandaı da bir septigin tıgizse, menen asqan baqytty adam bola qoımas. Prezıdentterge artylǵan júktiń aýyr ekenin, árıne, bilemin, túsinemin. Eki eldiń dostyǵyna oraı eki án jazǵanym esimde. Birinshi án qytaısha, ekinshisi qazaqsha jazyldy. Meniń kórsetken ónerim Qytaı prezıdentine erekshe áser etip, unatyp qalypty. Birden baıqaǵanym — ol kisi rýhanı turǵyda kemeldengen adam. Ándi tolyqqandy túsinýge tyrysyp, sezinip, tolǵanady. Jalpy óte mádenıetti kisi ekeni birden ańǵarylady. Sı Tszınpın myrzamen alǵash ret 2017 jyly I am a Singer jobasynan keıin kezdesken bolatynmyn. Ándi oryndap bolǵan soń ol kisi maǵan kelip, jalpy men týraly jáne meniń ónerim týraly, Qytaıdaǵy erekshe tanymaldyǵym týraly óz pikirin aıtqany esimde. Maǵan batasyn berip, ónerime jankúıer ekenin, sondaı-aq, áıeli de meniń ónerdegi jolymdy baqylap júretinin aıtyp, erekshe áserlendirdi. Bul, árıne, men úshin óte qýanyshty jáne sonymen qatar zor jaýapkershilik júktegen oqıǵa boldy», — deıdi Dımash Qudaıbergen.
Sol sátten beri 7 jyldan astam ýaqyt ótti.
«Osy ýaqyt ishinde men Qytaı mádenıeti, Qytaı tarıhy óte tereń jáne aýqymdy ekenin túsindim. Biz bar bolǵany kórshi elmiz. Mádenı turǵydan alǵanda, osy baǵytta bizdiń salanyń barynsha kóp ókilderi jumys istegenin qalaımyz, óıtkeni búkil álem, mysaly, Djekı Channyń kim ekenin biledi. Qytaı mádenıetiniń qandaı ekenin bári biledi. Sol sebepti mádenıetimizdi, eldigimizdi álemge dáripteıtin qazaqstandyq jigitter qytaı ónerpazdarymen birlesip jumys jasaý kerek. Árıne, osyǵan baılanysty Qytaı men Qazaqstan arasyndaǵy mádenı almasý odan ári jandana túsetini sózsiz. Al, osy oraıda Qazaqstan men Qytaı óte jaqsy dıplomatııalyq qarym-qatynastaǵy elder ekenine de qýanyshtymyn. Meniń mindetim — beıbitshilikti, súıispenshilikti, túsinistik pen dostyqty qoldaý. Men tek Qytaı men Qazaqstanda ǵana emes, sonymen qatar, búkil álemdegi tyńdarmandar men kórermenderge jetkizgim keletini: halyqtar arasynda tek beıbitshilik pen kelisim ornap, soǵyssyz beıbit ómir ornaǵanyn qalaımyn», — dep aǵynan jarylady ánshi.
