Dımash Qytaıdyń Chendý qalasynda ótken jańa jyldyq kontsertte óner kórsetti
ASTANA. KAZINFORM – 26 jeltoqsanda Qytaıdyń ońtústik-batysyndaǵy Sychýan provıntsııasynyń ortalyǵy Chendý qalasynda «2025四川省新年音乐会» («2025 jylǵy Sychýannyń jańa jyldyq kontserti») ótti. Bul týraly dimashnews.com jazdy.
«Tıanfý órkenıetiniń poetıkalyq esteligine» kóptegen tanymal tulǵalar jınaldy. Olardyń arasynda qazaqstandyq mýzykant Dımash Qudaıbergen de boldy.
Dımash óziniń repertýaryndaǵy qytaı tilindegi eń ádemi lırıkalyq ánderiniń biri – «The Crown» ánin oryndady. Bul án 2017 jyly «Xiaomi Super GOD MOBA» mobıldi oıynyna saýndtrek retinde shyqqan qazaqstandyq kompozıtor Ulyqpan Joldasovtyń «Kim eken» shyǵarmasynyń qytaı tilindegi nusqasy.
Sondaı-aq Dımash Qytaıdyń tanymal ánshisi Veı Veımen birge «Join Hands» ánin oryndady. «Golden Panda» syılyǵyna laıyqty dep tanylǵan «Join Hands» ánin ataqty Chjý Haı men kompozıtor, «Oskar» syılyǵynyń mýzykalyq sýdıasy Natan Vang jazǵan. Ol alǵash ret 2023 jyly 20 qyrkúıekte Chendý qalasynda ótken «Golden Panda» marapattaý rásiminiń fınalynda oryndaldy.
Dımash Qudaıbergen Bıbigúl Tólegenovany mereıtoıymen quttyqtap, jazba jarııalaǵanyn jazǵan bolatynbyz.