Dımash Qytaıdyń basty merekeleriniń birinde án shyrqady
Álege áıgili ánshi Dımash Qudaıbergen 29 qyrkúıekte Qytaıdyń Kúz ortasy festıvaline arnalǵan merekelik sharaǵa qatysty. QazAqparat bul týraly dimashnews.com resýrsyna silteme jasap habarlaıdy.
Qytaıdyń CCTV4 telearnasy Kúz ortasy festıvali merekesinen tikeleı translıatsııa júrgizdi. Dımash Qudaıbergen osy eldiń ánshisi Tan Veıveımen birge qytaı tilinde «Thousands of Miles, a Common Dream» ánin oryndady.
Tan dáýiriniń aqyny Chjan Tszıýlınniń óleńine jazylǵan erekshe kompozıtsııany alǵash ret Dımash Qudaıbergen 2020 jyly «Máńgilik klassıka» jobasynda shyrqaǵan bolatyn.
Al 2022 jyly qytaılyq ánshi Insı Chjan Dımashpen birge bul ándi Sailing jańa jyldyq gala-kontsertinde aıtty. 2023 jyly ol bul kompozıtsııany Qytaı men Ortalyq Azııa elderiniń halyqtyq mádenıeti men óneri jylynyń ashylý saltanatynda jáne Fýrongtaǵy Qytaı-Ortalyq Azııa jastar óner festıvalinde oryndaǵan edi.
Bıyl Dımash Qudaıbergen Tan Veıveımen birge «Thousands of Miles, a Common Dream» (Myń mılge bir arman) ánin sımfonııalyq orkestr men ártúrli elderdiń dástúrli aspaptary — Afrıka barabany, Indonezııalyq angklýng jáne Nepal bansýrıiniń súıemeldeýimen oryndaldy.
Eske salaıyq, Qytaı turǵyndary osy aptanyń jumasynda eldegi eń mańyzdy otbasylyq meıramdarynyń biri – Kúz ortasy merekesin (Chjýntsıýtsze) atap ótti. Ol Aı kúntizbesi boıynsha segizinshi aıdyń 15-shi kúninde toılanady. Bıyl mereke 29 qyrkúıekke tuspa-tus keldi.
