Dımash Qytaı telearnasymen birlesken mýzykalyq jobasyn Qazaqstanda túsiredi

ASTANA. KAZINFORM – Qazaqstanda «Voice Beyond Horizon» dep atalatyn aýqymdy mýzykalyq telejobanyń túsirilimi bastaldy. Shoýdy Dımash Qudaıbergen men Qytaıdyń iri medıaholdıngteriniń biri – Hunan TV telearnasy birlesip júzege asyrady.

Jobaǵa Qytaı, Qyrǵyzstan, Italııa, Túrkııa jáne Serbııadan kelgen oryndaýshylar qatysýda. Olar Dımashpen birge Qazaqstannyń kórikti óńirlerine shyǵarmashylyq sapar jasaıdy.

Túsirilim Astana men Almaty qalalarynda, sondaı-aq Almaty, Aqmola, Túrkistan jáne Mańǵystaý oblystarynda ótedi.

Realıtı-shoýdyń aqtyq kezeńi elordada uıymdastyrylmaq.

Qatysýshylar poıyzben jolǵa shyǵyp, eldiń tabıǵı jáne tarıhı nysandaryna aıaldaıdy. Negizgi aıaldamalar qatarynda Kóbeıtuz kóli, Sharyn jáne Bozjyra shatqaldary, Saıram-Ógem ulttyq parki bar.

Mýzykanttar shyǵarmashylyq kezdesýler ótkizip, jeke jáne dýet túrinde óner kórsetedi. Sonymen birge sheberlik sabaqtaryn uıymdastyryp, birlesken perfomans qoıylymdaryn usynady. Olardyń ónerin halyqaralyq deńgeıdegi kásibı qazylar alqasy baǵalaıdy.

Baǵdarlama Hunan TV telearnasynda jáne Mango TV tsıfrlyq platformasynda kórsetiledi. Bul medıaresýrstardyń aýdıtorııasy Qytaı men ózge elderde 1 mıllıardtan astam kórermendi qamtıdy.

«Voice Beyond Horizon» jobasy Qazaqstannyń mádenı murasyn jáne týrıstik áleýetin álemdik arenada tanytýǵa baǵyttalǵan mańyzdy bastama bolmaq.

Aıta keteıik, tanymal halyqaralyq agenttik Dımash Qudaıbergen týraly maqala jarııalady.