Dımash Qytaı telearnasy kórsetetin ánshiler baıqaýynyń prodıýseri bolady
ALMATY. KAZINFORM — Almatyda Dımashtyń fan-kezdesýi ótip jatyr.
Almaty Arena kesheninde uıymdastyrylǵan keshte ónerpaz súıinshi jańalyqpen bólisti.
— Qýanyshty jańalyǵym bar. Kezinde álemniń túkpir-túkpirindegi fan-toptarymnyń qalyptasýyna septigin tıgizgen úlken telejoba — I’m singer-di kórsetken Hunan TV arnasymen birigip, meniń alǵashqy prodıýserlik jumysym shyǵaıyn dep jatyr. Ol — I’m singer jobasy sekildi, biraq basqa formatta, basqa baǵytta álemdik deńgeıde ótetin halyqaralyq ánshiler baıqaýy. Sol jobanyń prodıýseri retinde aıaq alysym sizderdiń nazarlaryńyzda ótpek jáne jıýrı múshesi bolamyn. «Aryq aıtyp, semiz shyq» demekshi, aldaǵyny birge kóre jatamyz, — dedi Dımash Qudaıbergen.
Eske salaıyq, 27 mamyrdan bastap Astanada ótken «Stranger» shoýy elimizde alǵash ret kınoteatrlarda kórsetiledi.
Buǵan deıin Dımashtyń búgingi fan-kezdesýine 40-tan astam elden jankúıerler kelgenin jazǵanbyz.
Osy aıda Dımash Qudaıbergen belgili qazaq aqyny ári jazýshysy, qazaq ádebıetiniń negizin salýshylardyń biri Sáken Seıfýllınniń ánine túsirilgen jańa beınebaıannyń tusaýyn kesti.