Dımash Qyrǵyzstannyń halyq ártisi ataǵy týraly: Bul marapat – halyqtar dostyǵynyń nyshany
ASTANA. KAZINFORM — Belgili ánshi Dımash Qudaıbergen Qyrǵyz Respýblıkasynyń Halyq ártisi ataǵyn ózine kórsetilgen qurmet qana emes, qyrǵyz halqynyń qazaq halqyna degen iltıpaty retinde qabyldaǵanyn málimdedi, dep habarlaıdy KABAR.
Bul týraly ol Ystyqkól jaǵasynda ornalasqan Cholpon-Ata qalasynda ótip jatqan «Meıkın Azııa» halyqaralyq mýzykalyq festıvali aıasyndaǵy baspasóz máslıhatynda aıtty.
— Eń aldymen, Qyrǵyz Respýblıkasynyń Prezıdenti Sadyr Japarovqa rızashylyǵymdy bildiremin. Bul marapatty men qyrǵyz halqynyń qazaq halqyna degen qurmeti men moıyndaýynyń belgisi retinde qabyldaımyn. Qyrǵyzstannyń qonaqjaılylyǵyna jáne óner adamdaryna degen yqylasyna shyn júrekten tántimin, — dedi Dımash.
Sondaı-aq ol festıvaldi joǵary deńgeıde uıymdastyrǵany úshin uıymdastyrýshylarǵa alǵys aıtyp, aldaǵy ýaqytta da qos baýyrlas halyqtyń mádenı baılanysyn damytýǵa úles qosa beretinin jetkizdi.
Buǵan deıin, «Meıkın Azııa» festıvali aıasynda, Qyrǵyz Respýblıkasynyń Prezıdenti Sadyr Japarovtyń qoldaýymen Dımash Qudaıbergenge Qyrǵyz Respýblıkasynyń Halyq ártisi ataǵy berilgen.
Bul marapat Qyrǵyzstan men Qazaqstan arasyndaǵy mádenı yntymaqtastyq pen dostyqty nyǵaıtýǵa qosqan zor úlesi úshin tabystaldy.