Dımash qatysqan «Singer» baıqaýynda taǵy bir qazaqstandyq ánshi baq synaıdy

ASTANA. KAZINFORM – Qazaqstandyq ánshi, túrli baıqaýlardyń jeńimpazy Rýhııa Baıdúken Qytaıdaǵy «Singer» án baıqaýynda baq synaıdy. Bul jóninde ánshiniń prodıýseri Ertaı Núsipjanov málim etti.

«Araǵa 7 jyl ýaqyt salyp «Singer» sahnasyna qaıta oraldyq. Bul joly – Rýhııa. 4 jyl úzilisten keıin taǵy da mıllıondaǵan kórermenge jol tartqan aty álemge áıgili mýzykalyq telejoba bıylǵy mamyr aıynda bastaldy. Bul maýsymnyń basty ereksheliginiń biri – joba tikeleı efırde, Qytaıda ótip jatyr. Baǵalaý halyqtyń daýys berýi negizinde bolady», - dep jazdy E.Núsipjanov Facebook jelisinde.

Rýhııa búgin Qazaqstan ýaqytymen saǵat 17:00-de 8-kezeńde óner kórsetedi. «Top jarý» statýsymen kelgen sheteldik ánshige qoıylǵan talap boıynsha, Rýhııa aldyńǵy 7-kezeńde úzdik 4-ke engen ánshilerdiń birin tańdap, onymen jekpe-jek saıysqa túsedi.

«Baǵalaýshy barsha kórermenniń daýys berý nátıjesinde jeńse, kelesi kezeńge ótedi. Al jeńilse biz úshin saıys osy tusta aıaqtalady. Qalaı bolǵanda da, bul – úlken eńbek, artys-tartyspen kelgen jeńis. Jeńis deıtinim, úlken sahnada taǵy bir qazaq kúlli álemge óner kórsetip, qazaqtyń atyn shyǵarady. Budan asqan jeńis bar ma, sirá», - deıdi prodıýser.

Eske sala ketsek, 2017 jyly Dımash Qudaıbergen Qytaıdyń Hýnan telearnasynyń «Singer 2017» án baıqaýyna qatysyp, ekinshi oryndy jeńip aldy jáne álemdik arenada tanymal ánshige aınaldy.