Dımash Qaraǵandyda shahtaǵa túsip, balalarmen jáne sýretshi Kúıikovpen kezdesti
QARAǴANDY. KAZINFORM - Kenshiler kúnine oraı ótken, 250 myńǵa jýyq kórermen tamashalaǵan aýqymdy kontsertten keıin Dımash Qudaıbergen Qaraǵandydaǵy saparyn jalǵastyrdy, dep habarlaıdy Qaraǵandy oblysynyń ákimdigi.
Álemge tanymal ánshi jer astyna 700 metr tereńdikke túsip, Qarmet kompanııasyna qarasty Kostenko atyndaǵy shahtada boldy.
Ol kenshilerdiń kúndelikti eńbek jaǵdaıymen tanysyp, zamanaýı qaýipsizdik júıeleriniń jumysyn kórdi. Sondaı-aq shahta jumysshylaryn kásibı merekesimen arnaıy quttyqtady.
— Bul mamandyq ıelerine degen qurmetim erekshe. Sizderdiń eńbekterińiz aıryqsha qurmetke laıyq! – dep jazdy Dımash áleýmettik jelidegi paraqshasynda.
Qaraǵandyǵa sapary barysynda ánshi tanymal sýretshi, antııadrolyq qozǵalystyń belsendisi Káripbek Kúıikovpen de kezdesti.
Óner ıesi Dımashqa óziniń týyndysy men kitabyn syıǵa tartty. Keıin Káripbek Kúıikov kontsertke bara almaǵanyn aıtyp, Dımashpen jeke júzdeskenine qýanyshty ekenin jetkizdi.
Dımashtyń Qaraǵandydaǵy saparyndaǵy taǵy bir áserli kezdesý «Ásem» balalardy qoldaý ortalyǵynda ótti. Bul joly sahna da, jarqyraǵan jaryq de bolǵan joq.
Kezdesý qarapaıym ári jyly ótip, balalarmen erkin áńgime-dúken quryldy. Olar birge shaı iship, ázildesip, emen-jarqyn syrlasty.
— Balalarymyz úshin bul kezdesý úlken syılyq ári zor shabyt boldy. Bul – armandardyń oryndalatynyna degen senimdi nyǵaıtqan erekshe sát, – deıdi ortalyq qyzmetkerleri.
Dımash balalardyń áńgimesin yqylaspen tyńdap, olarǵa jyly lebizin bildirip, qoıǵan suraqtaryna jaýap berdi.
«Ásem» ortalyǵynyń qyzmetkerleri úshin bul kezdesý balalardyń júreginde uzaq saqtalatyn áserli sátke aınalǵan. Olar mundaı júzdesý balalarǵa armanǵa senýdiń jáne oǵan umtylýdyń qanshalyqty mańyzdy ekenin taǵy bir márte sezindirgenin atap ótti.
Osyǵan deıin Dımash Qudaıbergenniń Kenshiler kúnine arnalǵan kontserttiń hedlaıneri bolǵany týraly jazdyq.
