Dımash, Erke Esmahan, Qaırat Nurtas «Balalar Eýrovıdenıesinde» qazylyq etedi
ASTANA. QazAqparat - «Junior Eurovision Song Contest» halyqaralyq án baıqaýyna qatysatyn qazaqstandyq úmitkerlerdi irikteıtin ádil qazy alqasy anyqtaldy, dep habarlaıdy QazAqparat.
Bul týraly dúbirli dodany Qazaqstan aýmaǵynda translıatsııalaıtyn «Habar» agenttiginiń basqarma tóraǵasy Alan Ájibaev málimdedi.
«Qazaqstandaǵy Junior Eurovision baıqaýynyń ádil qazylary quramynda tanymal kásibı ánshiler men prodıýserler Roza Rymbaeva, Meırambek Bespaev, Tamara Asar, Baǵym Muhıtdenova, Erke Esmahan, Qaırat Nurtas, Renat Gaısın, Láılá Sultanqyzy, Mádına Sádýaqasova jáne Dımash Qudaıbergen bar. Olar qatysýshylardyń ótinimin qarap, fınalısterdi anyqtaıdy. Fınalıster 22 qyrkúıek kúni Almaty qalasyndaǵy gala-kontsertte óner kórsetedi», - dep jazdy Alan Ájibaev áleýmettik jelide.
Aıta keteıik, «Junior Eurovision Song Contest» halyqaralyq án baıqaýy 9 jastan bastap 14 jasqa deıingi oryndaýshylar qatysatyn «Evrovıdenıeniń» analogy. 15 jyldyq tarıhy bar baıqaýǵa elimiz alǵash ret qatysqaly otyr. Dúbirli dodany Qazaqstan aýmaǵynda «Habar» telearnasy translıatsııalaıdy. «Habar» Agenttigi 2016 jylǵy 1 qańtardan bastap is-sharany uıymdastyratyn Eýropalyq habar taratý odaǵynyń (EBU) qaýymdasqan múshesi bolyp tabylady, bul múshelik atalǵan baıqaýǵa qatysý úshin elden úmitker usynýǵa múmkindik berdi.
2018 jylǵy 1 tamyzdan bastap «Habar» agenttigi «Junior Eurovision Song Contest» halyqaralyq án baıqaýyna qatysý úshin úmitkerlerdiń respýblıkalyq irikteýin bastady.
Respýblıkalyq irikteýdiń jeńimpazyn 2018 jyly 25 qarashada Mınskte ótetin fınalǵa daıyndyq kútedi. Qatysýshyny Mınsktegi baıqaýǵa daıyndaýmen «Habar» Agenttigi aınalysady.
