Dımash DiMENSIONS atty jańa álemdik týrnesin jarııalady
ASTANA. KAZINFORM — Dımash Qudaıbergenniń jańa «DiMENSIONS» jobasy – ýaqyt pen keńistikti sharlaý ıdeıasyna negizdelgen týyndy emes, bul – ártistiń bolmysyn ony qorshaǵan álemniń qabyldaýy arqyly tanytýǵa baǵyttalǵan talpynys, dep habarlaıdy Dimashnews.
«DiMENSIONS» Dımashtyń ánshi, kompozıtor jáne prodıýser retindegi kópqyrly shyǵarmashylyq kelbetin, sondaı-aq sahnadan tys ómirindegi tabıǵı bolmysy men adam retindegi eń shynaıy qyrlaryn beıneleıdi. Bul qyrlar onyń árbir týyndysynda kórinis tabatyn kúsh pen shabyttan, ulttyq mádenı murasyna degen adaldyǵynan, syrtqy sabyrlylyǵynyń astarynda jatqan jan jylýynan, ómir jolynda jınaqtalǵan oı-tolǵamdary men ózin úzdiksiz tanýǵa degen umtylysynan aıqyn ańǵarylady.
Álem jurtshylyǵy Dımashty eń aldymen onyń qaıtalanbas daýysymen tanıdy. Al bul kontserttiń negizgi maqsaty – kórermenge sol erekshe daýystyń ıesi bolyp tabylatyn tulǵanyń tutas bolmysyn ashyp kórsetý.
Emotsııa, estelikter men ánshiniń ómirindegi taǵylymdy sátter arqyly sahnalyq keńistik birtindep onyń ishki áleminiń kórkem beınesin somdaıdy. Nátıjesinde kórermen nazaryna ártúrli ólshemderdegi bytyrańqy jeke fragmentter emes, týǵan jerge degen súıispenshilikpen, shynaıy sezimdermen, ómirlik ustanymdarmen, jańa belesterdi baǵyndyrýǵa degen talpynyspen jáne onyń shynaıy «Menimen» tutastyq tapqan biregeı kórkem beıne usynylady.
Aıta ketelik Dımashtyń jańa beınebaıany jaryqqa shyqqany týraly jazǵan edik.
