Dımash bolashaqta «Evrovıdenıe» baıqaýyna barýy kerek - ánshiniń ustazy

Ustazy - Marat Áıtimov. Kolledjde oqyp júrgen kezinde daýysynyń ereksheligin baıqadyq. Boıaýy, dıapazony eshkimge uqsamady. Ánshilerimiz 2 oktava alatyn bolsa, ol ándi birden 3 oktavoda oryndady. Qazir tórt oktavoǵa jetti. Bul óte sırek kezdesedi. Bizde emes, álemde sırek kezdesetin daýys. Bul týraly «QazAqparat» tilshisine Ahmet Jubanov atyndaǵy mýzykalyq kolledj dırektory Amanjol Ismaǵulov aıtty.

Dımash Qudaıbergen Qytaıda ótip jatqan «Men ánshimin» atty baıqaýdyń alǵashqy kúni-aq erekshe kózge túsip, el qýanyshyna bólene bastady. Baıqaýdyń ár aınalymyn úzbeı kórip, beıne sálemdeme, qoldaý hat jiberip otyrǵan ujymdar arasynda Ahmet Jubanov atyndaǵy mýzykalyq kolledj de bar. Sebebi, Dımash osynda bilim aldy, qalyptasty, úlken sahnaǵa jol ashyldy.  

 

«Dımash mýzykalyq stýdııada oqydy. Al kolledjge túsken kezde tyńdalym ótip, daýysynyń ereksheligi birden baıqaldy. Ol - tabıǵı daýys ıesi, tegine tartqan. Ata-anasy Qanat pen Sveta Aıtbaevtar elge tanymal ánshi. Birden klassıkalyq emes, estradalyq án ónerine beıim ekeni kórindi. Bizde estrada bólimi bolǵan joq. Sondyqtan akademııalyq ánderdi aıtty. Emtıhandarda óz baǵdarlamasyn tolyq oryndady. Bul Dımashtyń tańdaýy, baǵyty. Ustazy Marat Áıtimov eshkimge uqsamaıtyn ádistemesimen tárbıeledi»,- dedi mýzykalyq kolledjdiń dırektory Amanjol Ismaǵulov.

Ahmet Jubanov atyndaǵy mýzykalyq kolledjde bilim alǵan Dımash Qudaıbergen 2-kýrstan bastap túrli baıqaýlarǵa qatysty. Alǵashqysy  -  «Vostochnyı bazar» baıqaýy. Ol birden bas júldeni ıelendi. Kóptiń qoshemetine bólendi, Almaty men Astanadaǵy konservatorııa, óner akademııasy basshylarynyń kózine tústi. Olar Dımashty ózderi tárbıeleýdi maqsat etti.  

«Almaty, Astanaǵa barǵan kezde oqý bolmaıdy. Bolsa da, bizdikindeı emes.  Sebebi, ol jerdegi oqytýshylar quramy, professorlar únemi gastrolde júredi, daıyndyqqa ýaqyt az bolady. Bul - bir. Ekinshiden, Dımashtyń erekshe daýysyn baıqaǵan kezde kontsertterge kóp shyǵaratyn bolady. Aqtóbede de kontsertter bar, biraq daıyndyqqa ýaqyt kóp edi. Sol kezde Qanat Aıtbaev kelip, oǵan keńes berdim. «Dımashtyń daýysy qataıǵan joq, qalyptasyp kele jatyr. Emtıhandarda tyńdaımyz, bári durys. Bolashaǵy zor balany qaıta-qaıta kontsertterge aparyp, daýysyn buzyp alýymyz da múmkin. Ári úıdegideı bap bolmaıdy. Ózi tártipti, ınabatty bala. Úıden uzap shyǵyp kórmegen. 19 jasqa deıin Aqtóbede bolsa, daýysy qataıǵan soń konservatorııaǵa túsedi» dep aıttym. Qanat jibermedi, Dımash osy jerde oqýyn bitirdi»,- dedi A.Ismaǵulov.

Buǵan deıin «Vostochnyı bazar», «Slavıan bazary» baıqaýlarynda top jarǵan Dımash qazir Qytaı sahnasyn baǵyndyryp júr. Kún ótken saıyn abyroıy artyp, tanymaldylyǵy eselene tústi. Alda áli 12 aınalym bar. Ár apta saıyn ánin tyńdap, tamsanyp, tań qalyp otyratyn mýzykalyq kolledj ujymy áleýmettik jeli arqyly óz quttyqtaýlaryn jetkizip otyrýdy umytqan emes. Kóbi básekelesterinen qorqady, saqtanyp júrýin tileıdi.

 

«Janynda ákesi Qanat Aıtbaev júr. Ol durys. Qazirgi ýaqytta ókinishke qaraı ártúrli jaǵdaılar bolyp jatady. Adamdar biz kınodan kórip júrgen kóptegen qıturqy áreketterge barýy múmkin. Tamaǵyna qosyp beredi, daýysyn buzady. Ondaı joq emes, bar. Kóbine aıtylmaıdy. Kórip, estip jatyrmyz. Vıtebskige barǵanda Dımash muny óz basynan ótkergen. Qytaıda da básekelestik myqty. Ony qarsylastarynyń tań qalǵan túrinen kórip otyrmyz. Vıtastyń ánin oryndaǵanda «shalqalarynan» tústi. Kolledjde án aıtyp júrgende de «artyq almasynshy, jyrtyp alady daýysyn» dep qorqatyn edim. Ustazy Marat Áıtimov onyń qory bar ekenin bildi, sendi», dedi A.Ismaǵulov.

Ustazdary Dımashtyń alar asýy áli alda dep otyr. Olar jas talanttyń Eýropa sahnasyn baǵyndyrǵanyn qalaıdy.

«Dımash bolashaqta «Evrovıdenıe» baıqaýyna barýy kerek. Tarıhta Qazaqstannan eshkim qatyspaǵan ol baıqaýǵa. Bir qorqatynym, qandaı konkýrsqa barsa da ol ekinshi oryn alyp kórmegen. Oǵan psıhologııalyq ta daıyndyq qajet. Ekinshi oryn alsa, basylyp qalýy múmkin. Dımash Aqtóbege kelgende kolledjge arnaıy soǵady. Bir kelgeninde «Jer betimen júr, kóterilme. Kóterilseń, juldyz bolasyń, eshkimdi tanymaısyń» dedim. Dımashta ondaı joq. Ata-anasy jaqsy tárbıe bergen. Ekinshiden, únemi tań qaldyramyn degen oıdan arylǵan durys. Qazir tań qaldyryp, daýysyńdy joǵaltýyń múmkin. Únemi qordy saqtap, odan bıik alýdan saqtaný qajet. Bul maman retinde aıtqan aqylym»,- dedi mýzykalyq kolledj dırektory.

 

Amanjol Ismaǵulovtyń aıtýynsha, bul erekshe ekinshi daýys. Dál osy daýys álem deńgeıinde án shyrqaǵan Erik Qurmanǵalıevte bolǵan. «1983 jyly ol Almatydaǵy konservatorııasyna túsýge kelip, ustazdar Máskeýge jiberdi. Ekinshi kýrsta Eýropaǵa baryp, altıno daýysymen bas júlde aldy. Almatyda kontserti boldy. Ókinishke qaraı, týma talant, tabıǵı daýys ıesi qaza boldy. Kózińdi jumyp tyńdasań, qyz án salyp turǵandaı edi. Sodan keıingi ekinshi daýys - Dımashta. Ereksheligi - Erik opera, Dımash estrada baǵytynda. Dımash ta álem deńgeıindegi myqty ánshi»,- dedi A. Ismaǵulov.

Aıta keteıik, Ahmet Jubanov atyndaǵy mýzykalyq kolledj túlikteri jan jaqta júr. Án salý bóliminiń alǵashqy meńgerýshisi Nıkolaı Taýbekov. Kolledj túlekteriniń arasynda  Máskeýdegi opera jáne balet teatrynyń solısi Svetlana Kosıan, ánshi Ómirqul Aınııazov, Mıras Bekjanov, Erke Esmahan, Qaırat Qapanov, Abaı atyndaǵy opera jáne balet teatrynyń solısi Esengeldi Yrza, Venera Alpysbaeva, ánshi Qaırat Igilikov, Dınara Taýbekova bar. Qazirgi kúni Akademııalyq án salý bóliminde Zýhra Tólemisova men taǵy úsh ustaz eńbek etip jatyr. Bul bólimde barlyǵy 35 bala bilim alyp júr.

 

Dımash Qudaıbergenniń sýreti mýzykalyq kolledjdiń Akademııalyq án salý bóliminde, dázilde, ustazdarynyń kabınetinde ilýli tur. Bul - maqtanysh, abyroı. Al Dımash Qudaıbergen Ahmet Jubanovtyń portretin kolledjge syıǵa bergen. Bul - túlektiń alǵysy, rızashylyǵy. 

 

Altynaı Saǵyndyqova