Dımash baıqaýda qazaq tilinde de án aıtady - Svetlana Aıtbaeva
«Qazirgi kezde Dımashqa sizderdiń qoldaýlaryńyz qajet. Materıaldyq jaǵynan emes, rýhanı demeý kerek. Bul qıyn, jaýapkershiligi joǵary baıqaý. Sebebi, 14 týrdan turady. Ár týrda jańa án aıtylady. Ándi uıymdastyrýshylar tańdaıdy. Ándi jetkize oryndaýda, obrazdy alyp shyǵýda sizderdiń yqylastaryńyz dem beredi. Al Aqtóbedegi alǵashqy kezdesý Ahmet Jubanov atyndaǵy mýzykalyq kolledjden bastalýy, qýantty. Belsendi Amır Ibragım «Biz qalaı kómektese alamyz?» dep surady. Sóıtip, hattar, beınesálemdemeler joldaı bastady. Olardyń arasynda jastar da, ustazdary da bar»,- dedi Dımashtyń anasy Svetlana Aıtbaeva.
Aqtóbelikter Dımash Qudaıbergenge ár kún saıyn jaqsy tilekteri men lebizderin jetkizip otyrady. Muny onyń ata-anasy Qanat pen Sveta Aıtbaevtar da bilip, rızashylyǵyn bildirip otyr.
«Baıqaý óte qıyn. Ár týr saıyn ózge tilde án shyrqaıdy. Eń qıyny qytaı tilinde án aıtý boldy. Dımash ony da úırenip, meńgerip aldy. Senbi kúni barlyǵymyz nátıjesin kóremiz. Bir aıta ketetin jaıt, ol bul baıqaýda qazaq tilinde de án aıtady. Ázirge biz usynǵan ánderdiń eshqaısysy uıymdastyrýshylardyń súzgisinen ótpeı tur».- dedi S.Aıtbaeva.
Dımash dombyra tartýdy kúıshi Jaılaý Asylhanovtan úırendi. Ol Aqtóbe mýzykalyq kolledjinde bilim ala júrip, qosymsha sabaq alǵan.
«Mýzyka kolledjiniń stýdenti úshin bir salany meńgerý azdyq etedi. Sondyqtan aspapta oınap, mýzyka tarıhyn da bilý paryz. Ónerdi tereń meńgerý, úlken sahnaǵa joldama alǵan kezde úlken septigin tıgizedi»,- dedi S.Aıtbaeva.
Aıta keteıik, Dımash Qudaıbergen Qytaıda vokaldan sabaq alýdy toqtatqan.
«Dımash vokaldan 2-3 sabaq alyp, keıin toqtatty. Ol «Marat aǵama (Marat Áıtimov - Dımashtyń ustazy) eshkim jetpeıdi dep barmaı qoıǵan»,- dedi S.Aıtbaeva.
