Dımash barsha jastardy qazaqtyń atyn álemge pash etýge shaqyrdy

ASTANA. QazAqparat - Ánshi Dımash Qudaıbergen Qazaqstan halqy Assambleıasynyń XXV sessııasyna qatysyp, óz tilegin jastarǵa arnady, dep habarlaıdy QazAqparat tilshisi.

Óz sózinde álemge áıgili jas ánshi barsha ónersúıer jerlesterine alǵys aıtyp, Prezıdent sııaqty qazaq halqyn dúnıejúzine tanytýǵa kúsh salatynyn jetkizdi. «Siz Qazaq elin álemge tanyttyńyz, ónerim arqyly, ánim arqyly qazaqtyń bolmysyn, tabıǵatyn, óshpes tarıhyn, ata-babalarymyz áýeletip ketken halyq ánderin álem sahnalarynda oryndaý, sharyqtatý meniń basty maqsatym boldy, bolady da. Qazirgi tańda álemniń qaı túkpirinde, qandaı álem sahnalarynda óner kórsetsem de, qazaq degen ór tulǵasy kelisken erekshe bir elden keldim dep maqtanyp aıtamyn. Keregesi keń, kimmen de bolsa terezi teń elimizdiń bolashaǵy jastardyń qolynda dep ózińiz aıtqan bolatynsyz. Qazirgi kezde óresi bıik jastar úshin úlken strategııamen elimizdi álemge tanytýǵa barlyq múmkindikter jasaldy. Osy oraıda barsha jastardy qazaqtyń atyn kúlli álemge pash etýge shaqyramyn», - dedi Dımash Qudaıbergen.

Sosyn óz sózin ol «San ǵasyrlar tarıhynan keshegi, Týǵan eldiń shejiresi esedi. Meniń elim Qazaqstanym, Otanym, bolashaǵy bizben birge ósedi» degen óleń shýmaqtarymen aıaqtady.

Aıta keteıik, sessııada Prezıdent memlekettiń damýyna kedergi jasaıtyn máseleler tóńireginde oı órbitti.