Dımash anasynyń tamaǵyn saǵynyp júr
ASTANA. QazAqparat - Dımash Qudaıbergenov "I am Singer" jobasyndaǵy qarsylastarynyń biri, qytaıdyń ataqty ánshisi Tan Tszınniń úıinde qonaqta boldy, dep habarlaıdy QazAqparat.
"I am Singer" jobasynda kóp tanys, dostar taptym! Árbir tanysymnyń ystyq yqylasy, maǵan degen nıeti erekshe kóńil-kúı syılaıdy. Qarsylasym bolsa da qonaqjaılylyǵyn kórsetip, Tan Tszın Beıjińdegi úıine qonaqqa shaqyrdy. Tan Tszın qytaıdyń ataqty ánshisi, kóptegen xalyqaralyq baıqaýlardyń jeńimpazy! Ata-anasy da ónerden aýyly alys emes. Dastarxan barysynda birge án shyrqap, ádemi tilekter aıtyp, qyzyqty áńgime-dúken qurdyq. Meniń xalal taǵam ǵana jeıtinimdi bilgen Tan Tszınniń anasy sıyr etinen daıyndalǵan tushpara daıyndady. Tipti, bir-ekeýin óziń de istep kór dep usynys bildirdi. Árıne, menen myqty aspaz shyqpas, biraq qolymnan kelgenshe tyrystym! Tan Tszınniń otbasy, ata-anasymen tanysqanyma qýanyshtymyn, keremet jandar! Desek te, óz Anamnyń daıyndaıtyn tamaqtaryn saǵynyp kettim!..» - dep jazdy Dımash óziniń ınstagramynda.
