Dılıara Qaıdarova: Prezıdent farmatsevtıkalyq óndiristi damytýdy der kezinde tapsyrdy
«Prezıdent Qasym-Jomart Toqaev Qazaqstan halqyna Joldaýynda densaýlyq saqtaý júıesin damytý jónindegi mindetterdi atap ótti. Medıtsına mamandary Memleket basshysynyń medıtsına qyzmetkerlerine yntalandyrý ústemeaqylaryn tóleý týraly tapsyrmasyn zor yntamen qabyldady. Bul maqsatqa memlekettik bıýdjetten 150 mıllıard teńge bólinedi. Prezıdent 2023 jyly medıtsına qyzmetkerleriniń jalaqysy el boıynsha ortasha jalaqydan 2 esege jýyq ósetinin atap ótti. Medıtsına qyzmetkerleriniń materıaldyq ál-aýqatyn arttyrý medıtsınalyq qyzmet kórsetý sapasyna oń áser etedi, olardyń biliktiligin arttyrýǵa degen umtylysyn arttyrady jáne olardyń erteńgi kúnge degen senimin nyǵaıtady dep úmittenemiz» – deıdi Dılıara Qaıdarova.
Onyń aıtýynsha, búgingi tańda Qazaqstannyń barlyq oblystarynda aýyr naýqastarǵa onkologııalyq kómek kórsetetin 19 mekeme jumys isteıdi. Onkologııalyq aýrýlarmen kúres jónindegi 2018-2022 jyldarǵa arnalǵan keshendi jospar sheńberinde óńirlik onkologııalyq ortalyqtardy qajetti zamanaýı jabdyqtarmen jaraqtandyrý, radıologııalyq apparattar parkin jańartý kózdelgen.
Sonymen qatar, Qazaqstannyń onkologııalyq qyzmeti jas kadrlardy, onkolog dárigerlerdi daıarlaýǵa, sondaı-aq jumys istep turǵan medıtsınalyq qyzmetkerlerdiń biliktiligin arttyrýǵa múddeli.
«Onkologııa naýqastaryn dári-dármekpen qamtý máselesine kelsek, dári jetkizýge «SQ-Farmatsııa» qurylymy jaýap beredi. Onkologııalyq naýqastar dári-dármekpen tegin qamtamasyz etiledi, olardy memleket esebinen satyp alady. Biraq, ókinishke oraı, keıde sheteldik, ómirlik mańyzdy dári-dármekterdi jetkizýde irkilister bolady, al onkologııany emdeýde naýqas úshin ár mınýt mańyzdy. Prezıdenttiń Qazaqstanda farmatsevtıkalyq óndiristi damytý týraly tapsyrmasy der kezinde aıtyldy jáne jaqyn arada onkologııalyq naýqastarǵa ómirlik mańyzy bar dári-dármekterdi uzaq ýaqyt kútýdiń qajeti joq jáne olar el ishinde árdaıym qoljetimdi bolady degen oıdamyz», - deıdi elimizdiń bas onkology.
Prezıdent óz sózinde jańa kópsalaly aýrýhanalardyń qurylysy týraly atap ótti. Buǵan deıin Ult Kóshbasshysy - Elbasy Nursultan Nazarbaevtyń tapsyrmasy boıynsha Elordada eń ozyq halyqaralyq tájirıbe negizinde onkologııalyq naýqastarǵa joǵary tıimdi medıtsınalyq kómek kórsetý úshin jańa Ulttyq ǵylymı onkologııalyq ortalyqtyń (UǴOO) qurylysy bastaldy. Jaqynda jańa jabdyqtarmen jabdyqtalǵan Ulttyq ǵylymı onkologııalyq ortalyq Qazaqstannyń túkpir-túkpirinen kelgen aýyr naýqastarǵa tegin onkologııalyq kómek kórsetetin bolady.
«QazOjRǴZI» AQ mamandardyń biliktiligin arttyrý boıynsha úlken jumys júrgizýde, sheteldik mamandarmen oqytý konferentsııalary, sheberlik-klasstar, týmorbordtar únemi ótkizilip turady. Biz joǵary bilikti kadrlardy daıarlaýǵa múddelimiz. Sońǵy birneshe jylda «QazOjRǴZI» AQ-nyń rezıdentýrasynda ondaǵan jas mamandar bilim alyp, olar oqýdan keıin óńirlik onkologııalyq ortalyqtarǵa jıberildi. Onkologııalyq aýrýlarmen kúres - obyrdy erte dıagnostıkalaý, emdeý, onkologııalyq naýqastardyń ómir súrý sapasyn arttyrý – Qazaqstannyń áleýmettik saıasaty men densaýlyq saqtaý salasynyń basym mindetteri bolyp tabylady.
«QazOjRǴZI» AQ ujymy Memleket basshysynyń aıtylǵan barlyq bastamalaryn qoldaıdy. Biz memleketimiz ben qazaqstandyqtardyń densaýlyǵy úshin jumys isteımiz»,– dep qortyndylady ǵylymı-zertteý ınstıtýtynyń dırektory Dılıara Qaıdarova.
