Dilnaz Ahmadıevanyń «Kóz aldymda» albomy tuńǵysh ret qazaq tilinde shyqty (FOTO)
ASTANA. QazAqparat - Ánshi Dilnaz Ahmadıeva týǵan kúnin atap ótti. Týǵan kún merekesimen qatar, «Kóz aldymda» dep atalatyn jańa albomynyń tusaýkeserin ótkizdi, dep habarlady https://baistars.kz.
Kesh Almaty qalasyndaǵy meıramhanalardyń birinde ótti. Týǵan kún ıesin ónerdegi áriptesteri men dostary quttyqtap keldi. Olardyń qatarynda Baıan Esentaeva, Jeńis Ysqaqova, Aıqyn, Erik Tastambekov, Adıl Lııan, Nurjan Kermenbaev, Alýa Qonarova, Maqpal Isabekova, Lıdo, Raımjan Hamraev, «Rıngo» toby, Lýına, Rınat Gaısın, Nurlan Abdýllın, Rano Ýmarova, Álisher Karımov ta boldy. Týǵan kún ıesin quttyqtap, árıne Dilnazdyń ata-anasy men aǵasy Dilshat ta qasynan tabyldy.
Ánshiniń osyǵan deıin birneshe albomy jaryq kórgen bolatyn. 2001 jyly «Mojet odnajdy», 2002 jyly «Wapadarim», 2005 jyly «Zolotoı», 2007 jyly «Moe serdtse», 2010 jyly «Lıýbovıý zadety» atty albomdary tyńdarmanǵa tartý etilgen. Keshe ǵana tanystyrylymy ótken «Kóz aldymda» albomyn Dilnaz tuńǵysh ret qazaq tilinde shyǵaryp otyr.
