Dılnaz Ahmadıevaǵa áleýmettik jelide til tıgizgen almatylyq isti boldy
ALMATY. QazAqparat - Almaty qalasynyń Polıtsııa departamenti ultaralyq arazdyqty qozdyrǵan 29 jastaǵy azamatqa qatysty qylmystyq tergeýdi bastady, dep habarlaıdy QazAqparat tilshisi.
Almaty turǵyny Instagram jelisi arqyly sanaly túrde ultaralyq jáne dinı sıpattaǵy alaýyzdyq týdyratyn áreketterge barǵan.
«Ol ótken jyldyń kúzinde Instagram jelisinde azamatsha D.Ahmadıevanyń paraqshasynda óz logınimen óreskel pikirler qaldyrǵan. Osylaısha, buǵan deıin de qaraqshylyq boıynsha sotty bolǵan jigit áleýmettik jeli arqyly ulttyq jáne dinı sıpattaǵy alaýyzdyq týdyrǵan. Kelip túsken aryzdar boıynsha polıtsııa QR QK-niń 174-baby boıynsha sotqa deıingi tergeý sharalaryn júrgizdi. Jedel-izdestirý sharalary barysynda alaýyzdyqty nasıhattaýshynyń kim ekeni anyqtaldy. Sot saraptamasy jaýapkerdiń jelide qaldyrǵan pikirlerinde ulttardyń ar-namysyna tıetin sózder bolǵanyn rastady. Ol óz kinásin moıyndap, keshirim surady» - delingen departamenttiń Facebook jelisindegi resmı paraqshasynda.
Polıtsııa áleýmettik jeli qoldanýshylaryn ózgelerdiń jeke basyna til tıgizip, ulty men dinı senimin qorlaýdan saq bolýǵa shaqyrady. Sebebi ol úshin qylmystyq jaýapkershilik qarastyrylǵan.
