Dıkıı Arman ózine qol jumsamaq boldy

ASTANA. KAZINFORM — Qańtar oqıǵasy kezindegi qylmysy úshin 20 jylǵa sottalǵan «Dıkıı Arman» laqap atymen tanymal Arman Jumageldıev ózine qol salmaq boldy.

Bul málimetti QR Іshki ister mınıstrliginiń baspasóz qyzmeti rastady. 

— Bul sottalǵan (Arman Jumageldıev — red.) ózine azdaǵan jaraqat keltirdi. Oǵan dereý medıtsınalyq kómek kórsetildi. Densaýlyq jaǵdaıy qanaǵattanarlyq. Sottalǵan erekshe baqylaýda. Onymen mekeme psıhologtary jumys júrgizýde, — dep habarlady Qylmystyq-atqarý júıesi komıteti.

Málimetke saı, osy fakti boıynsha qyzmettik tekserý taǵaıyndaldy.

Eske salaıyq, 2022 jyly Almatyda polıtseıler qylmys áleminiń bedeldisi Arman Jumageldıevti ustaǵan bolatyn.

Keıin QR Bas prokýratýrasy «Dıkıı Arman» toby 24 beıbit turǵyndy urlap, kúshtep ustaǵanyn aıtty.

2023 jyly qyrkúıek aıynda Almaty mańyndaǵy № 72 túzeý mekemesiniń tergeý ızolıatorynda máslıhattyń eks-depýtaty Qaırat Qudaıbergen men Arman Jumageldıevke qatysty sot protsesi bastaldy.

Buǵan deıin «Dıkıı Arman» jetekshilik etken uıymdasqan qylmystyq toptyń 15 múshesi ustalǵanyn jazǵanbyz.

2024 jyldyń jeltoqsan aıynda Arman Jumageldıevtiń isi boıynsha sotta jaryssóz ótken bolatyn.

27 qańtarda qylmys áleminiń serkesi «Dıkıı Arman» 20 jylǵa sottalǵany belgili boldy.