«Dıqannyń kóńili nege kúpti?» - respýblıkalyq basylymdarǵa sholý
***
Almatyda Túrkitildes memleketter Yntymaqtastyq keńesiniń I Sammıti bolyp ótti. Oǵan Ázerbaıjan Respýblıkasynyń Prezıdenti Ilham Alıev, Qyrǵyz Respýblıkasynyń Prezıdenti Roza Otýnbaeva jáne Túrik Respýblıkasy Premer-mınıstriniń orynbasary Bekır Bozdaǵ qatysty. Osy alqaly jıyn arqaý bolǵan maqala «Egemen Qazaqstan» gazetinde jaryq kórdi. «Tarıhtyń óne boıynda tamyry tereń báıterektiń butaqtaryndaı túrki memleketteriniń tutastyǵy ózektiligin eshbir joǵaltqan emes. Eldigimiz qalpyna kelip, etek-jeńimizdi jıǵan tusta tatýlyqpen sýarylǵan aýyzbirshiliktiń kerektigi qaı kezdegiden de kókeıkesti bolyp otyr. Elbasy Nursultan Nazarbaevtyń tóraǵalyǵymen ótken Túrkitildes memleketter Yntymaqtastyq keńesiniń І Sammıti babalar muraǵa qaldyrǵan qasıetti paryzdyń pernelerin basqany aqıqat», - dep jazady basylym. Sammıt jaıynda tereńirek bilgińiz kelse, basylymnyń senbilik sanyndaǵy «Báıterektiń butaqtary» degen taqyrypqa nazar aýdaryńyz.
«Egemen Qazaqstan» gazetiniń jazýynsha, eki kúnnen beri álemniń buqaralyq aqparat quraldary Lıvııanyń burynǵy basshysy Mýammar Kaddafıdiń qaza tapqany týraly habarlap jatyr. Lıvııa ulttyq ótpeli keńesiniń premer-mınıstri Mahmud Djıbrıldiń málimdeýinshe, M.Kaddafı tutqyndalǵan kezde jaraly jáne tiri bolǵan. Onyń kózin joıý jóninde buıryq berilmegen. Polkovnıkti aýrýhanaǵa alyp bara jatqanda, onyń jaqtastary men ótpeli keńes áskerleri arasynda atys bolǵan. Atys kezinde M.Kaddafıdiń basyna oq tıip, qaza tapqan.
***
Pavlodar oblysy ekonomıkalyq-áleýmettik jaǵynan damý dańǵylyn betke alǵan aımaq. Munda kózdelgen maqsattarǵa qol jetkizý úshin barlyq jaǵdaılar jasalǵan, múmkindikter de az emes. Óńirde óndiris nysandarynyń ashylýymen birge jańa jumys oryndary paıda bolýda, otandyq taýar óndirisiniń kókjıegi keńeıip, halyqtyń jaǵdaıy jaqsarýda. Bul - pavlodarlyqtardyń el Táýelsizdiginiń 20 jyl ishinde qol jetkizgen tolaǵaı tabystary. Osy oraıda Astanadaǵy Pavlodar oblysy kúnderi qarsańynda «Aıqyn» gazeti óńir basshysy Baqytjan Saǵyntaevpen aradaǵy suhbatty jarııalap otyr. Ekýeara áńgime «Óndiristi óńirde ózgeris kóp» degen taqyryppen berilgen.
«Dıqannyń kóńili nege kúpti?». «Aıqyn» gazetiniń senibilik sanynda osy taqyryppen jaryq kórgen maqalada Tobyl óńiriniń dıqandary aǵymdaǵy jylǵy mol ónimniń paıdasyn kóre alamyz ba, dep alańdap otyrǵandyǵy baıandalǵan. Basylymnyń atap ótýinshe, buǵan astyq baǵasynyń naryqta quldyrap ketýi sebep bolyp otyr. Al ony saqtaıtyn oblystaǵy elevatorlar aýzy-murnynan shyǵyp lyq tolyp tur. Sondyqtan mol ónim ashyq aspan astynda qalyp ysyrap bolýy múmkin.
***
«Investıtsııa máseleri boıynsha ekonomıkalyq yntymaqtastyq jáne meılinshe perspektıvaly baǵyttaryn talqylaýdy yntalandyrý jáne naqty bıznes-jobalardy ilgeriletý. Qazannyń 20-21 kúnderi sonaý «Tumandy albıon» tórinde, Londonnyń qaq ortasynda QR Ekonomıkalyq damý jáne saýda mınıstrliniiń qoldaýymen Qazaq-Brıtan saýda ónerkásip palatasy muryndyq bolǵan bıznes forýmnyń kózdegen basty maqsatyn bir sózben jetkizsek - osy», - dep jazady «Alash aınasy» gazeti búgingi nómirindegi «London: basty nazarda - Qazaqstan» degen taqyryptaǵy maqalasynda. Basylymnyń atap ótýinshe, eki el arasyndaǵy saýda aınalymy ótken jyly 2104,4 mılıon AQSh dollaryn qurasa, aǵymdaǵy jyldyń 7 aıynda 1379,3 mıllıonǵa jetken.
Osy basylymnyń turaqty «Dat?» aıdarynda fılologııa ǵylymynyń doktory, professor Ánýar Taraqpen aradaǵy suhbat «Aýdarma máselesine memlekettik deńgeıde mán beretin kez jetti» degen taqyryppen berilgen. Basylymnyń barlyq saýaldaryna tuşymdy jaýap bergen ol: «Keıbir jekelegen oqý oryndary, kolledjderde de aýdarma isi bólimi jumys isteıdi. Jekelegen aqyly kýrstar da bar. Ol jerlerde aýdarmashylar daıarlanyp jatqanymen, oqytý úderisinde bir júıelilik, naqty baǵyt-baǵdar qalyptaspaǵan. Osy máselege memlekettik deńgeıde mán beretin kez jetken sııaqty. Menińshe zaman suranysyna saı jazbasha jáne aýyzsha aýdarma mamandaryn oqytatyn derbes ınstıtýt ashýǵa da bolady»,- deıdi.
***
«Dúısenbi kúni Parlament Májilisiniń Tóraǵasy Oral Muhamedjanov Belarýs Respýblıkasyna resmı saparmen barady», - dep jazady «Kazahstanskaıa pravda» gazeti. Basylymnyń atap ótýinshe, bul sapar barysynda Belarýs Respýblıkasynyń Prezıdenti Aleksandr Lýkashenkomen, sondaı-aq Premer-mınıstri Mıhaıl Mıasnıkovıchpen kezdesýler ótetini qarastyrylýda. Májilis Tóraǵasynyń Belarýs Respýblıkasy Ulttyq jınalysy Ókilder palatasynyń Tóraǵasy Vladımır Andreıchenkomen jáne Belarýs Respýblıkasy Ulttyq jınalysy Respýblıkalyq keńesiniń Tóraǵasy Anatolıı Rýbınovpen kezdesýler ótkizetini josparlanýda.
