Dıqandarǵa sýbsıdııa alýda qıyndyq týdyrǵan birqatar talap joıylady

PETROPAVL. QazAqparat – Soltústik Qazaqstan oblysynda bıyl aýyl sharýashylyǵy salasyna sýbsıdııa túrinde 63,3 mlrd teńge memlekettik qoldaý kórsetilmek. Onyń 20 mlrd teńgege jýyǵy ósimdik sharýashylyǵyna baǵyttalmaq, dep habarlaıdy QazAqparat tilshisi.

SQO ákimdiginde ótken jıynda óńir basshysynyń birinshi orynbasary Marat Tasmaǵanbetovtyń aıtýynsha, sýsıdııa retinde sonyń ishinde tuqymǵa 1,7 mlrd teńge, pestıtsıdterge 11 mlrd teńgege jýyq, tyńaıtqyshtarǵa 7 mlrd teńge bólinbek.

Budan basqa mal sharýashylyǵyna - 9,6 mlrd teńge, basqa baǵyttarǵa - 33,7 mlrd teńge berilmek.

«Bul qarajat salany tolyq sýbsıdııalaýǵa jetkiliksiz, jyl saıyn qarjy tapshylyǵyn baıqap otyrmyz. Qajettilik shamamen 35 mlrd teńgeni quraıdy, sonyń ishinde tuqym sharýashylyǵyna 2 mlrd teńge, mıneraldy tyńaıtqyshtarǵa 5 mlrd teńge, pestıtsıdterge 10 mlrd teńge qajet.

Búgingi tańda ótinimderdi qabyldaý bastaldy. Osy kúnge deıin 8,9 mlrd teńge sýbsıdııa tólendi, onyń ishinde 4,4 mlrd teńgesi ótken jyldan kútý paraǵynda turǵan ınvestıtsııalyq sýbsıdııalar», - deıdi Marat Tasmaǵanbetov.

Mamyr aıynda pestıtsıdterdi sýbsıdııalaý boıynsha ákimdik qaýlysy tirkelgennen keıin osy baǵyt boıynsha sýbsıdııalar tóleý bastalady.

«Ósimdik sharýashylyǵyndaǵy basty másele - Qazaqstan Ǵarysh Sapary aqparattyq júıesi arqyly egistikterdi tsıfrlandyrý qajettiligi. Aýyl sharýashylyǵy mınıstrliginiń aqparatyna sáıkes, alqaptardy mindetti túrde tsıfrlandyrý talaby bıyl pılottyq rejımde joıylmaq.

Sondaı-aq mıneraldy tyńaıtqyshtardy sýbsıdııalaý úshin agrohımııalyq taldaý kartalarynyń mindetti túrde bolýy jónindegi talap ta joıylady», - deıdi SQO ákiminiń birinshi orynbasary.

Búgingi kúni qaıta óńdeý baǵyty boıynsha sýbsıdııaǵa ótinish berýde qıyndyqtar bar, óıtkeni elektrondyq shot-faktýralardy bekitetin modýl óshirilgen. Al ınvestıtsııalyq jáne mal sharýashylyǵyna qatysty sýbsıdııalar boıynsha másele joq.