Dıqandarǵa qosymsha 50 myń tonna dızel beriledi

ASTANA. QazAqparat - Elimizdiń birqatar astyqty óńirine qosymsha 50 myń tonna arzandatylǵan dızel otyny bólinedi. Bul týraly búgin QR Úkimetiniń selektorlyq rejimdegi otyrysynda QR Premer-Mınıstriniń orynbasary - Aýyl sharýashylyǵy mınıstri Ómirzaq Shókeev aıtty, dep habarlaıdy QazAqparat tilshisi. 

«Aýa raıyna baılanysty ótkende ákimdikter másele kótergen bolatyn. Olar bıdaıdyń ylǵaldylyǵyn tómendetý úshin qosymsha arzandatylǵan dızel otynyn bólýdi surady. Jalpy, qazir kestege sáıkes bıylǵy egin jınaý naýqanyna 394,4 myń tonna dızel otyny bólingen. Baǵasy bir lıtrine - 164 teńge»,- dedi ol.

Ó.Shókeevtiń aıtýynsha, atalǵan kólemniń 73 paıyzy zaýyttardan jóneltilip, 89 paıyzynyń qarajaty tólengen. 

«Energetıka mınıstrligimen birlesip, kelise otyryp, taǵy da qosymsha 50 myń tonna dızel bólý múmkindigin taýyp otyrmyz. Onyń ishinde Aqmola oblysyna - 14 myń, Shyǵys Qazaqstan oblysyna - 5 myń, Qaraǵandy oblysyna - 2 myń, Qostanaı oblysyna - 13 myń, Pavlodar oblysyna - 2 myń, Soltústik Qazaqstan oblysyna - 14 myń tonna beriledi. Baǵasy 1 lıtrine - 191 teńge. Ol endi qazirgi naryqtaǵy baǵadan 9 paıyzǵa arzan», - dedi mınıstr.