Dıqandarǵa arnalǵan dızel nelikten túrli túske boıalady
ASTANA. KAZINFORM — Bıylǵy egis naýqanyna 400 myń tonnadan astam dızel bólindi, dep habarlaıdy Energetıka mınıstrliginiń baspasóz qyzmeti.
Energetıka mınıstrligi kóktemgi egis jumystaryn júrgizý úshin aýyl sharýashylyǵy taýaryn óndirýshilerdi dızel otynymen qamtamasyz etý jumystaryn jalǵastyryp jatyr. Jetkizilimder bekitilgen kestege sáıkes júzege asyrylyp, vedomstvonyń turaqty baqylaýynda.
Jyl basynda Energetıka jáne Aýyl sharýashylyǵy mınıstrlikteri egis naýqanyna arnalǵan 402 myń tonna dızel otynyn jetkizý kestesin bekitti. Jetkizilimder aǵymdaǵy jyldyń 1 aqpany men 30 maýsymy aralyǵynda júrgiziledi. Energetıka mınıstrligi usynǵan dızel otynynyń baǵasy óńirlerdegi jetkizý stantsııasyna deıin QQS-pen birge lıtrine 263 teńgeni quraıdy. Sońǵy baǵany óńirlik operatorlar aıqyndaıdy jáne ol lıtrine 281 teńgege deıin bolýy múmkin. Bul ortasha bólshek saýda baǵasynan 49 teńgege nemese 15%-ǵa tómen.
— Aýyl sharýashylyǵy taýaryn óndirýshilerge arnalǵan dızel otynyn bólýdiń ashyqtyǵyn jáne onyń qozǵalysyn baqylaýdy qamtamasyz etý maqsatynda buǵan deıin birqatar qosymsha shara engizilgen bolatyn. Atap aıtqanda, jeke PIN-kodtar belgilenip, otyndy sary, kók jáne qyzyl tústerge boıaý júıesi engizildi, sondaı-aq elektrondyq shot-faktýralar júıesinde dızel otynyna arnalǵan jeke vırtýaldy qoıma quryldy. Qabyldanǵan sharalar dızel otynyn maqsatsyz paıdalaný kólemin azaıtýǵa múmkindik berdi. Atap aıtqanda, naqty tutyný kólemi 729 myń tonnadan 602 myń tonnaǵa deıin tómendep, 21%-ǵa qysqardy, — delingen habarlamada.
Energetıka mınıstrligi aýyl sharýashylyǵy taýaryn óndirýshilerdi dızel otynymen úzdiksiz qamtamasyz etý máselesin turaqty baqylaýda ustap otyr.
Budan buryn dıqandar dızel otynyn qandaı baǵamen alatynyn jazǵanbyz.
