Dıqandarǵa alqaptyń onnan bir bóligine jańa dándi-daqyldardy egý usynylyp jatyr
ASTANA. QazAqparat - Dıqandar keleshekte óz alqabynyń 10 paıyzdyq aýmaǵyna elıtaly dándi-daqyldy sepse, ónimdilik arta túsedi. Bul týraly QR AShM «Ulttyq agrarlyq ǵylymı bilim berý ortalyǵy» KEAQ Basqarma tóraǵasy Asqar Nametov OKQ-da ótken baspasóz máslıhatynda málim etti, dep habarlaıdy «QazAqparat» HAA tilshisi.
«Dándi-daqyldardyń máselesi qazirgi tańda birinshi kezekke shyǵyp otyr. 10 jyldan beri egilip kele jatqan tuqymdardy Aýyl sharýashylyǵy mınıstrligi alyp tastaımyn dep jatqan joq. Biz oǵan sýbsıdııa kómegin kórsetpeımiz dep otyr. Bir jaǵynan mınıstrlik tarapynan bul sheshimniń esebi de, sebebi de bar. Árıne, ol usynys joba retinde talqylanýda. Jobaǵa saraptama jasalyp, tıimdi jáne tıimsiz tustary sońynda anyqtalyp, tıisti sheshim qabyldanýy múmkin», - deıdi Ulttyq agrarlyq ǵylymı bilim berý ortalyǵynyń basqarma tóraǵasy.
Asqar Nametovtyń aıtýynsha, dıqandar qazirgi tańda qoldanystaǵy úırenshikti dándi-daqyldardyń tuqymyn 10-15 jyl boıy ege beredi.
«Sebebi, bizdiń dıqandar bir dándi-daqylǵa úırenip qalǵan. Aýystyrǵysy kelmeıdi. Dıqandardyń bir legi «Maǵan basqa daqyl túriniń keregi joq, men úırengen bıdaıymdy ege beremin» deýi múmkin. Dıqannyń qambasyndaǵy daqylyn eshkim tartyp alǵaly jatqan joq. Ary qaraı qoldana bersin. Biraq, ol dıqandarǵa burynǵy dándi-daqyldy 10 jyldan keıin ege berse, oǵan kómek kórsete almaımyz. Nelikten deseńiz, ár daqyldyń óziniń ónimdilik ýaqyty keledi. Biraq, biz naryqqa jańa daqyldardy engizý jumysyna den qoıǵymyz keledi. Sonda tehnologııa da jańarady. Shyny kerek, bizdiń kóptegen dıqandar dándi-daqyldyń 5-6 reprodýktsııasynda sapasy áldeqaıda joǵalǵan bolsa da ege beredi. Ol dándi-daqyldar tazalyǵyn joǵaltyp, basqa sorttarmen aralasyp ketken», - deıdi Asqar Nametov.
Asqar Nametov sóz sońynda dıqandar keleshekte óz alqabynyń 10 paıyzdyq aýmaǵyna elıtalyq dándi-daqyldy sepse, ónimdilik te arta túsetinin jetkizdi.
