Dıqandarǵa 375 myń tonna arzandatylǵan dızel otyny jetkiziledi
ASTANA. QazAqparat - Aýyl sharýashylyǵy taýarlaryn óndirýshilerge kóktemgi egistik jumystaryn júrgizý úshin 375 myń tonna arzandatylǵan dızel otyny jetkiziledi. Bul týraly búgin Ortalyq kommýnıkatsııalar qyzmetindegi brıfıngte QR Energetıka vıtse-mınıstri Áset Maǵaýov málim etti, dep habarlaıdy QazAqparat.
«Aǵymdaǵy jyly Aýyl sharýashylyǵy mınıstrligimen birlese otyryp, óńirlerge dızel otynyn jetkizý kestesin bekittik. Onyń kólemi 375 myń tonna kóleminde belgilenip otyr. Zańmen aýyl sharýashylyǵy taýarlaryn óndirýshilerge qajet dızel otynyn tıep, jóneltý basymdyq retinde qarastyrylǵan», - dedi Áset Maǵaýov.
Vıtse-mınıstrdiń atap ótýinshe, zańnamamen dızel otynynyń baǵasyn tómendetý qarastyrylmaǵan. Aýyl sharýashylyǵy taýarlaryn óndirýshilerge dızel otynynyń 1 tonnasy munaı bazalarynan 127 myń teńgeden bosatylady. Degenmen, tasymaldaý jáne saqtaý shyǵyndaryn qosa alǵanda ol óńirlerge lıtrine 117-127 teńgeden jetkiziletin bolady. Al janarmaı quıý stansalaryndaǵy dızel otynynyń 1 lıtriniń baǵasy 131 teńgeni quraıdy.
«Aýyl sharýashylyǵy taýarlaryn óndirýshilerge jetkiziletin dızel otynynyń 79 myń tonnasyn Atyraý munaı óńdeý zaýyty, 233 myń tonnasyn Pavlodar munaı-hımııa zaýyty jáne 63 myń tonnasyn Shymkent munaı zaýyty bóledi», - dedi ol
