Dıqandardy tuqymmen qamtamasyz etýdiń biregeı tetigi iske qosyldy
ASTANA. QazAqparat - Dıqandarǵa kóktemde alǵan tuqym ótemin kúzde qaıtarýǵa múmkindik beriledi. Bul týraly búgin QR AShM Ósimdik sharýashylyǵy ónimderin óndirý jáne qaıta óńdeý departamentiniń dırektory Azat Sultanov aıtty, dep habarlaıdy QazAqparat tilshisi.
Onyń atap ótýinshe, 2019 jyldyń 1 qańtarynan astyq tuqymyn sýbsıdııalaýdyń jańa tetigi iske qosylyp otyr.
"Qazirgi ýaqytta aýyl sharýashylyǵy taýaryn óndirýshiler úshin tuqym asa qajet. Alaıda ol ekinshi satyda qalyp otyr. Sebebi qazirgi ýaqytta fermerlerge tehnıkasynyń júrýi úshin janarmaı daıyndaýy, jumysshylarynyń jalaqasyn tóleýge, tyńaıtqysh satyp alýǵa, ósimdikti qorǵaýǵa aqsha tabýy kerek. Sodan keıin baryp tuqymǵa nazar aýdaratyn. Óıtkeni, ótken jyly astyq túsimin tuqym retinde paıdalanýǵa bolatyn edi", - dedi Azat Sultanov.
Departament basshysynyń aıtýynsha, endigi ýaqytta dıqandar tuqymdyq astyqty tólem ýaqytyn keıinge shegerý arqyly alýǵa múmkindigi bar.
"Eger buǵan deıin olarǵa tuqymǵa aldyn ala tólem jasaý úshin qarjy izdep tabýyna týra kelse, endi esh tólemsiz-aq normaǵa saı tuqym ala alady. Ony egip, kúzde ónim alǵannan keıin de jeńildikter beremiz. Olar alǵan tuqym qunynyń 30 paıyzyn ǵana tóleıdi", - dedi ol.
