Dıqandar Berdibek Saparbaevqa túıitkilderin jetkizdi
TARAZ. QazAqparat – Jambyl oblysynyń ákimi Berdibek Saparbaev Baızaq aýdanyna jumys saparymen baryp, kóktemgi egis jumystarynyń daıyndyq barysymen tanysty, egin sharýashylyǵyn damytýdaǵy ózekti máselelerdi talqylady. QazAqparat bul týraly aımaq basshysynyń resmı saıtyna silteme jasap habarlaıdy.
Oblys ákimi aldymen aýdandaǵy iri sharýa qojalyqtarynyń biri «Aspan agroǵa» at basyn burdy. Qojalyq basshysy Saha Manatovtyń aıtýynsha, sharýashylyqtyń 1500 gektar jeri bar. Onyń 600 gektary óziniń 200 bas múıizdi iri qarasyna arnalǵan jaıylym alqaby. Sondaı-aq, sharýa qojalyǵy óz jylyjaıynda kókónis ósirýmen aınalysýda. Qyzylsha, júgeri, bıdaı jáne alma ósirý isin de jolǵa qoıǵan.
«Aspan agro» memlekettik «Sybaǵa» baǵdarlamasynyń alǵashqy qatysýshylarynyń biri. Saha Manatov memlekettik qoldaý sharalary tıimdiligin alǵa tartyp, lızıngke aýyl sharýashylyǵy tehnıkasyn jáne jyl saıyn qyzylsha ósirý úshin sýbsıdııaǵa qol jetkizip otyrǵanyn aıtty.
«Qazirgi 110 gektar jerge qyzylsha otyrǵyzý jumystaryn bastap kettik. Kelisim shart arqyly «Taraz« ÁKK tuqymmen qamtamasyz etýde. Ol úshin tıisti qarjyny ónimdi jınaǵannan keıin qaıtaramyz», - dedi ol.
Sharýashylyq basshysy qyzylshasyn eshqaıda ótkize almaı qalatynynan qaýiptenetinin jasyrmady. Oǵan sebep qyzylsha ósirýshiler men Merki qant zaýyty arasyndaǵy máseleniń áli kúnge tolyq sheshilmegendigi bolyp otyr. Oblys ákimimen kezdesken basqa da tátti túbir ósirýshiler osy túıtkildi kóterdi.
«Dıqandarǵa qant qyzylshasynyń egis alqabyn kemitýge bolmaıdy. Merki qant zaýytyna qatysty másele meniń jeke baqylaýymda. Zaýyt basshylyǵymen arnaıy keste jasaldy. Keste boıynsha olar óz bereshekterin tolyq tóleýge tıis. Sáýir aıynyń sońyna deıin bul másele sheshilýi kerek», - dedi Berdibek Saparbaev.
Sondaı-aq, aımaq basshysy sýbsıdııa kóleminiń ulǵaıǵany týraly tilge tıek etti. Bul jańalyq baızaqtyqtarǵa jiger syılap, sharýalar qyzylsha ósirýdi belsendi túrde jalǵastyratyndaryna sendirdi. Olar 250 sharýashylyqty qamtıtyn oblystyń qyzylsha ósirýshileriniń qaýymdastyǵy qurylatynyn jetkizdi.
Fermerler hımııalyq tyńaıtqyshtarǵa qol jetkizý ońaı emestigin alǵan tartty. Olar tyńaıtqyshtardy kelisimshart arqyly jergilikti hımııalyq zaýyttardan alýǵa nıetti ekendikterin, al aqshany ónimdi ótkergennen keıin qaıtarǵysy keletindikterin jetkizdi. Aımaq basshysy bul máseleni qarastyrýǵa ýáde berdi.
Berdibek Saparbaev óńirdegi sý arnalaryn, drenajdyq júıeler men qurylystardy qaıta jańǵyrtý barysymen tanysty. Aýdanda «Túımekent», «Dóńsary», «Ótegen», «Uzyn» ishki sharýashylyq kanaldaryn qamtıtyn «Baızaq» magıstraldy kanaly bar. Qazir olardy tazalaýmen «Talas-Asa» sý sharýashylyǵy kásipornynyń bazasyndaǵy mehanıkalyq jasaq aınalysýda. Bóget salynyp, sý toraptary jóndelýde. Onyń jalpy smetalyq quny 700 mıllıon teńgeni quraıdy. Oblys basshysy jobalaýshy men tehnıkalyq qadaǵalaýshylardyń jumysyna narazylyq bildirip, olar eskermegen kóp kemshilikterge kóńil bóldi.
