Dıqandar astyq baǵasynyń kóterilýin kútýde

«Qazaqstandyq fermerler astyq baǵasynyń qymbattaýyn kútip otyr. Degenmen, tamyz aıynda elimizde satylǵan astyqtyń kólemi 390 myń tonnadan asty. Qoldau.kz portalynyń statıstıkasyna sáıkes ótken aıda 3-surypty jumsaq bıdaıdyń ortasha baǵasy 47 500 teńge boldy. Bul rette tamyz aıynyń ekinshi jartysynda astyq qunynyń qymbattaýy baıqaldy.  Naryqtaǵy eń belsendi óńirlerge  astyǵy mol Aqmola, Soltústik Qazaqstan jáne Qostanaı oblystary kirip otyr. Bulardaǵy mámile kólemi sáıkesinshe 185, 122 jáne 55 myń tonna astyqty qurady», - delingen ortalyq málimetinde.

Aıta keterligi, eń qymbat astyq Qostanaı oblysynyń enshisinde. Bul óńirde 3-surypty qatty bıdaıdyń 733 tonnasy 61 500 teńgeden satylǵan. Al osydan bir apta buryn ǵana dál osy óńirde 3-surypty qatty bıdaıdyń shamamen 800 tonnasy  tonnasyna 49 myń teńgeden saýdalanǵan edi.

«Búginde árbir fermer úshin nan baǵasyna qatysty másele óte mańyzdy ekendigin túsinemiz. Barlyǵy da óz eńbekteriniń laıyqty bolǵanyn qalaıdy. Degenmen búgingi kúni astyq naryǵy týraly aqparat alýan túrli bolyp otyr. Endigi ýaqytta  onlaın rejimde statıstıka júrgiziletin qoldau.kz portaly arqyly  kez kelgen azamat astyqtyń qandaı baǵaǵa jáne qandaı sapada satylyp jatqanyn bile alady. Satylym baǵasy men kólemi tek naqty óńirler sheginde ǵana emes, sonymen birge astyq qabyldaý kásiporyndarynda da kórinip turady. Bul  óndirýshiler úshin de tıimdi», - dedi «Aqparattyq-esepteý ortalyǵy» AQ bas mamany Azamat Qurmanov.

Tamyz aıynda satylǵan 390 myń tonna astyqtyń 82 paıyzyn 3-surypty bıdaı quraıdy. Sol aıdyń ekinshi jartysynda astyq baǵasy birshama qymbattady. Máselen, 3-surypty jumsaq bıdaıdyń tonnasy ortasha eseppen 49 927 teńgege saýdalanǵan. Eń joǵary baǵa Aqmola oblysynda tirkelgen. Bul óńirde astyq satyp alýshylar bıdaıdyń bir tonnasyna 51 myń teńge usynǵan. Al Aqtóbe men Qostanaı dıqanshylary dál osy surypty bıdaıdy 50 myń teńgeden satqan. Pavlodar men Soltústik Qazaqstan  oblystarynda satyp alýshylar 1 tonna bıdaıǵa shamamen 48 500 teńge usynýda.