Dıhandarǵa dızel otynynyń 1 lıtri 68 teńgeden jetkiziledi

Bul týraly búgin selektorlyq rejımdegi Úkimet otyrysynda Munaı jáne gaz mınıstri Saýat Myńbaev málim etti.

Kóktemgi egis naýqanyna oraı oblystar boıynsha dızel otynymen qamtamasyz etýdiń tizimi bekitilgenine toqtalǵan S. Myńbaev, barlyǵy 354 myń tonna arzandatylǵan dızel otynyn bólý josparlanyp otyrǵanyn jetkizdi.

Atap aıtqanda, munaı óńdeý zaýyttarynyń dızel otyny lıtri 59 teńgeden jiberiledi. Al tutynýshylarǵa, ıaǵnı aýyl sharýashylyǵy taýaryn óndirýshilerge dızel otyny 68 teńgeden jetkiziledi. Mınıstrdiń sózine qaraǵanda, 68 teńge bul tutynýshylarǵa jetkiziletin eń sońǵy baǵa. «Bólshek naryǵynda dızel otynynyń baǵasy qazirgi kezde 76 teńgeni qurap otyr. Atap aıtqanda, bólshek saýdamen salystyrǵanda 11 paıyz deńgeıinde jeńildik jasalatyn bolady»,-dedi S. Myńbaev.

Óz kezeginde Aýyl sharýashylyǵy mınıstri Aqylbek Kúrishbaev bul baǵa (68 teńge) ishki naryqtaǵy baǵanyń aýytqýy deńgeıine qaramastan kóktemgi dala jumystarynyń barlyq kezeńinde, ıaǵnı naýryz ben mamyr aıyn qosa eseptegende saqtalatynny aıtty.