Dıqandar dızel otynyn qandaı baǵamen alady
ASTANA. KAZINFORM – Bıyl kóktemgi dala jumystaryna 402 myń tonna dızel arzandatylǵan baǵamen beriledi. Bul týraly Úkimet otyrysynda Energetıka mınıstri Erlan Aqkenjenov aıtty.
- 2026 jylǵy qańtarda Energetıka jáne Aýyl sharýashylyǵy mınıstrlikteri 2026 jylǵy 1 aqpan men 30 maýsym aralyǵyndaǵy kezeńge «2026 jylǵy kóktemgi dala jumystaryna 402,2 myń tonna dızel otynyn berý grafıgin» bekitti. Óńirlerdegi dızel otynyna Energetıka mınıstrligi usynatyn aǵymdaǵy baǵa lıtrine qosylǵan qun salyǵymen 263 teńge bolady. Túpkilikti baǵany óńirlik operator belgileıdi. Ol lıtrine 281 teńgeni quraıdy. Bul lıtrine 49 teńgege arzan nemese janarmaı quıý stantsııalaryndaǵy bólshek saýda baǵasynan 15 paıyzǵa tómen, - dedi ol.
Mınıstrdiń aıtýynsha, aýyl sharýashylyǵy taýarlaryn óndirýshiler úshin dızel otyny qozǵalysynyń ashyqtyǵy men baqylaýdy qamtamasyz etý úshin mynadaı sharalar qabyldanǵan:
- jeke PIN-kodtar belgileý;
- dızel otynynyń túsin sary, kók jáne qyzylǵa boıaý;
- elektrondyq shot-faktýra júıesine dızel otyny úshin bólek vırtýaldy qoıma qurý.
- Nátıjesinde naqty irikteý 729 myń tonnadan 602 myń tonnaǵa deıin nemese 127 myń tonnaǵa nemese 21 paıyzǵa azaıdy. Bul tájirıbeni jalǵastyrý aýyl sharýashylyǵy taýarlaryn óndirýshiler úshin dızel otynyn maqsatty paıdalanýdy qamtamasyz etedi, - dedi Erlan Aqkenjenov.
Onyń dereginshe, aqpan-sáýir aralyǵyndaǵy kezeńge 402,2 myń tonnadan 204,8 myń tonna nemese 51 paıyz dızel otyny tıep jóneltildi. Naqty aıtqanda, aqpanda 12,7 myń tonna, naýryzda 94 myń tonna, sáýirde 97,8 myń tonna jiberilldi. Al mamyrda 116,3 myń tonna, maýsymda 32,9 myń tonna jóneltý josparlanyp otyr.
- Aýyl sharýashylyǵy taýarlaryn óndirýshilerge dızel otynyn tıep-jóneltý Energetıka mınıstrliginiń turaqty baqylaýynda, - dedi mınıstr.
Aıta keteıik, Úkimet otyrysynda kóktemgi dala jumystarynyń barysy talqyǵa salynyp jatyr.
