Dıhan Qamzabekuly: Tarıhty oqyǵan saıyn Táýelsizdigimizdiń baıandylyǵyn bilgendeı bolamyz
ASTANA. QazAqparat - Astanadaǵy Qazaqstan Respýblıkasy Ulttyq mýzeıinde Alash qaıratkeri Qoshke Kemeńgerulynyń 120 jyldyǵyna arnalyp «Amanatqa adaldyq» atty «dóńgelek ústel» ótti.
Sharaǵa zııaly qaýym ókilderi, Qoshke Kemeńgerulynyń urpaqtary, mektep oqýshylary men JOO stýdentteri qatysty.
«Bizge ózimizdiń ulttyq tarıh búginde anaǵurlym mańyzdy jáne qajet. Biz kúnen-kúnge tarıhty bilgen saıyn Táýelsizdigimizdiń baıandylyǵyn, sonymen birge Elbasymyz negizdep otyrǵan «Máńgilik el» muratynyń baıandylyǵyn bilgendeı bolamyz»,-dedi L. N. Gýmılev atyndaǵy EUÝ prorektory Dıhan Qamzabekuly jınalǵan jastarǵa qaratyp aıtqan sózinde.
Osy oraıda prorektor Q. Kemeńgeruly 20 ǵasyrdyń basynda ulttyq reformalardyń qaq ortasynda júrgen tulǵalarmen tikeleı baılanysty qaıratker ekenin aıta kele, onyń murasy sol kezeńdegi zııalylardyń izdenisin kórsetetinin atap ótti.
«Qoshke Kemeńgeruly týraly kóp aıtýǵa bolady. Qoshkeni búgingi kúni qaı baǵytta taný, ıaǵnı Astanadaǵy Ulttyq mýzeı qaı baǵytta Qoshkege eńbek sińire alady degen oı turǵysynan bir-eki tujyrymymdy aıtqym keledi. Árıne, Ulttyq mýzeıdiń zaldarynda osynda otyrǵan azamattar bolǵanbyz, osy rette Alashqa, tarıhqa qatysty zaldar bar. Ýaqyt ótken saıyn kóp nárse jańǵyrtylady jáne tolyqtyrylady. Sondyqtan Qoshkeniń biraz eńbekteri Ulttyq mýzeıge tóltýma, túpnusqa turǵysynan qoıylsa da artyq bolmas edi dep oılaımyn»,-dedi Dıhan Qamzabekuly.
Sonymen qatar ol Ulttyq mýzeıdiń ereksheligine toqtala kele, osynda qylqalam sheberleriniń týyndylary óte kóp ekenin atap ótti.
«Bul ónerge úlken oryn berilgen. Endi qylqalam sheberleriniń Qoshke Kemeńgerulynyń teatr qaıratkeri retinde, teatrǵa eńbek sińirgen tulǵa retindege sýretin kórsek keremet bolar edi»,-dep atap ótti EUÝ prorektory.
