Dıhan Qamzabekuly: Sáken Júnisovke Astana tórinen eskertkish qoıý kerek

ASTANA. QazAqparat - Belgili qoǵam qaıratkeri, prozaık, dramatýrg, pýblıtsıst, ádebıet synshysy, memlekettik syılyqtyń ıegeri Sáken Júnisovke Astana tórinde eskertkish qoıý kerek. Bul týraly búgin Astanada ótken Sáken Júnisov týraly derekti fılmniń tusaýkeserinde fılologııa ǵylymdarynyń doktory Dıhan Qamzabekuly málim etti.

«Sáken Júnisovtiń qazaq ádebıetine sińirgen eńbegi ushan teńiz. Onyń artynda qalǵan elimizdiń mańyzdy kezeńderin beınelegen súbeli shyǵarmalary - qunyn joımaıtyn qundylyqtardyń biri, halyq ómiriniń kórkem shejiresi. Qaıratkerdiń ózi el-jurtyna keńinen tanylǵan, halyqymyzdyń seri azamaty, qadirli uly. Onyń qalamynan shyqqan árbir eńbegi únemi halyqtyń júregine jol taýyp, rýhanı asyl qazynasyna aınaldy. Ol ádebıet sheberleriniń ishindegi asa daryndylarynyń biri ekeni sózsiz. Sáken tek jazýshy ǵana emes, oǵan qosa tanymal qoǵam qaıratkeri. Astananyń irgesin qalaýǵa da ózindik úles qosqan tulǵalardyń biri. Ómiriniń sońyna deıin eli úshin eńbek etti. Marqumnyń súıegi osy Astanada jatyr. Endi Sákenge Astana tórinen eskertkish qoıý kerek», - dep atap ótti Dıhan Qamzabekuly.

Kúnsultan Otarbaı