Dıhan Qamzabek: «AMANAT» eń áýeli áleýmetshil partııaǵa aınalýy kerek
«Partııa da qoǵamnyń aınasy,. Ol qoǵamdaǵy bılikke jetken toptyń da, bılikke umtylýshy toptyń da arman-múddesin kórsetedi. Árıne, biz Nur Otan-dy bıliktiń partııasy dep keldik. Parlamenttegi negizgi kópshilikti de solar qurady. Qazir qoǵam ózgerdi. 5 qańtardan keıingi qoǵamdy, qalaı desek te, qandaı ólshemmen qarasaq ta, ózgergen qoǵam. Ony ýaqyttyń ózi ózgertti, Qazaq eliniń damýy osyǵan alyp keldi. Partııanyń «AMANAT» degen atpen jańǵyrǵany ádebıetshi, ádeıbet tarızynyń mamany retinde meniń kóńilimnen shyǵyp otyr», -dedi ǵalym.
Akademık jańǵyrýdy bastan ótkerip jatqan bılik partııasy halyq 30 jyldan beri kútip kele jatqan ıgilikterdiń qoǵam ómirine enýine jol ashýǵa tıis dep esepteıdi.
«Burynnan kele jatqan eldik arqaýymyz bar. Sondaǵy negizgi bir kilt sózderdiń biri osy «AMANAT». Eń basty másele nede? Halyqtyń amanaty nede edi? Búkil halyq táýelsizdikti armandap kútti. Ol elge áleýmettik ıgilikter ákeledi, halyqtyń óz qoly óz aýzyna jetedi dep eseptedi. Biz tilden, dástúrden, mádenıetten kembaǵal bolyp qalǵanbyz. Otarshyldyq dáýirdiń azabyn kóp tarttyq. Sonyń ornyn túgendeıdi dep kúttik. «AMANAT» sol armandy oryndaýy kerek», - deıdi qoǵam qaıratkeri.
Onyń aıtýyna qaraǵanda, «AMANAT» eń áýeli áleýmetshil partııaǵa aınalýy kerek.
«Men bul partııaǵa 2004 jyldan beri múshemin. Júrgen jerimniń bárinde partııamyzdyń jańarýy týraly osy oıdy aıtyp júrmin. Bul áleýmetshil, halyqtyń múddesin ornatatyn partııa bolýy kerek.
Al rýhanı máselede osyǵan deıin ne oryndalmady? Sony jerge túsip, halyqpen birge bolyp, arman-múddesin oryndaıtyn partııa bolýy shart.
Bárimiz elden shyqtyq. Aýyldarda búkil istiń qııýyn keltirip, tetigin aýyp otyratyn aqsaqaldar bolady. Sol el aǵalary qalaı jumys isteıdi? Osyndaı ulttyń tanymynda bar tetikterdi ujym kóleminde, memleket kóleminde qarap, iske asyrýǵa bolady. Іs basynda júrgen «AMANAT» partııasynyń músheleri osyny qolǵa alýy kerek dep oılaımyn. Bul da qoǵamnyń bir ólshemi, barometri. Erteń halyq berilgen ýádeniń esebin suraıdy. Onyń ústine túrli saılaýlar kele jatyr. Aýyl ákimderin, aýdan ákimderin saılaý jolǵa qoıylyp jatyr. Munyń bárinde «AMANAT» basqa da partııalarmen teń básekede pisip, jetilýi kerek. Bizde jalpy partııalarymyz pisip, jetilmeı qalǵan. Qansha jerden nasıhattap, atyn jarqyratyp ilip qoıǵanmen, partııa adam sekildi ózi jetilýi kerek», - dedi Dıhan Qamzabek.