«Digital Qazaqstan» strategııasyn ázirleýdi jedeldetý qajet – Úkimet basshysy

- Tsıfrlandyrý jáne jasandy ıntellekt jylyn sátti ótkizý úshin kásibı qoǵamdastyq pen halyqty keńinen tartýdy qamtamasyz etý mańyzdy. Osyǵan baılanysty Jasandy ıntellekt mınıstrligine qańtar aıynyń sońyna deıin Jyldyń is-sharalar tizbesin anyqtap, bekitýdi tapsyramyn. Sondaı-aq múddeli taraptarmen birlesip, «Digital Qazaqstan» strategııasyn ázirleýdi jáne bekitýdi jedeldetý qajet, - dedi Oljas Bektenov.

Premer-mınıstr Parlament tsıfrlandyrýdy damytýdyń negizin qalyptastyrýǵa baǵyttalǵan Tsıfrlyq kodeksti qabyldaǵanyn atap ótti. 

- Basqa da zańnamalyq aktilerge ózgerister ázirlep, Májiliske engizý, sondaı-aq zańǵa táýeldi barlyq salalyq quqyqtyq aktilerdi sáıkestikke keltirý qajet. Júrgizilip jatqan zańnamalyq ózgerister boıynsha IT-qoǵamdastyq pen jurtshylyq arasynda keńinen túsindirý jumystaryn júrgizý kerek, - dedi ol.

Oljas Bektenovtiń paıymynsha, jasandy ıntellekt memlekettik sektorda da belsendi engizilýge tıis. 

- Ony qoldaný atústi avtomattandyrýǵa emes, qalyptasyp qalǵan protsesterdi qaıta qaraýǵa, memlekettik fýnktsııalardy oryndaýdyń neǵurlym tıimdi modelderine kóshýge jáne bıýrokratııadan arylýdy odan ári jalǵastyrýǵa ákelýi kerek. Ulttyq ekonomıka mınıstrligi Strategııalyq josparlaý agenttigimen jáne basqa da múddeli memlekettik organdarmen birlesip, tsıfrlandyrýdy keńeıtýdi jáne jasandy ıntellektiniń qoldanylýyn eskere otyryp, basqarýdyń barlyq deńgeıindegi fýnktsııalardy qaıta qaraýǵa tıis. Sonymen qatar Jasandy ıntellekt mınıstrligi mınıstrlikterdiń birinshi basshylarynyń tsıfrlyq orynbasarlary – CDO qyzmetiniń nátıjelerine sapaly taldaý júrgizip, 2026 jylǵa jáne odan keıingi jyldarǵa arnalǵan jańa kórsetkishterdi belgileýi qajet, - dedi Úkimet basshysy.

Aıta keteıik, Qazaqstan halqyn Jańa jylmen quttyqtaǵan Memleket basshysy Qasym-Jomart Toqaev 2026 jyldy Tsıfrlandyrý jáne jasandy ıntellekt jyly dep jarııalaǵan edi.