Digital Qazaqstan 2026: EÚAK qatysýshylary Qazaqstannyń tsıfrlyq ındýstrııasynyń jetistikterimen tanysty

Forým ekspozıtsııasy startaptar men IT-kompanııalardyń jobalaryn, robototehnıka jáne JI-drondar salasyndaǵy sheshimderdi, GameDev-baǵyttardy, sondaı-aq bilim berý, saraptamalyq jáne qoldanbaly ózara is-qımyl formattary bar AI Talent Hub alańdaryn biriktirdi. Mundaı tásil Qazaqstannyń biryńǵaı tsıfrlyq ekojúıeni damytý baǵytyn kórsetedi.

Delegatsııa basshylary memlekettik basqarý, ónerkásip jáne qalalyq ınfraqurylymǵa arnalǵan jasandy ıntellekt salasyndaǵy ázirlemelermen tanysty.

QR Jasandy ıntellekt jáne tsıfrlyq damý vıtse-mınıstri Dmıtrıı Mýn kópshilik nazaryna birqatar ınfraqurylymdyq bastamany usyndy, olardyń ishinde 35 memlekettik qyzmetti qamtıtyn AlemGPT mýltıagenttik platformasy jáne Ulttyq JI platformasynyń jobasy bar.

Tsıfrlyq ınfraqurylym salasynda data-ortalyqtar men energetıkany damytý jobalary usynylǵan. «Qazaqtelekom» AQ basqarma tóraǵasy Baǵdat Mýsın «DÓA alqaby» jobasynyń aldyn ala vızýalızatsııasyn tanystyrdy. Ol tehnologııalyq klasterdi kezeń-kezeńimen damytýdy, qýattylyǵy árqaısysy 50 MVt bolatyn JI DÓA-ny iske qosýdy jáne energetıkalyq ınfraqurylymdy keńeıtýdi kózdeıdi.
Qalalyq ortaǵa analǵan tsıfrlyq sheshimder óz aldyna bólek tanystyryldy. Atap aıtqanda, Shymkent qalasy ákiminiń orynbasary Arman Sábıtov ITS ıntellektýaldy kólik júıesin, AIQYN mektepteriniń tsıfrlyq qaýipsizdik júıesin jáne qoǵamdyq qaýipsizdik, ekologııa jáne qalalyq basqarý salasynda jedel áreket etý úshin qajetti drondardyń biryńǵaı ınfraqurylymyn kópshilik nazaryna usyndy.

Adamı kapıtaldy jáne fıntehti damytý blogynda Freedom Holding Corp kompanııasynyń sheshimderi tanystyryldy. Kompanııanyń bas atqarýshy dırektory Tımýr Týrlov Qazaqstan pedagogtarynyń ChatGPT Edu-ǵa qoljetimdiligin qamtamasyz etý boıynsha OpenAI-men birlesken jobany iske qosýdy qosa alǵanda, bilim berý men bıznes-protsesterge jasandy ıntellektini engizý jónindegi bastamalardy usyndy. Sondaı-aq Freedom-nyń AI-sheshimderin kórsetti, olar – operatsııalardy avtomattandyrýǵa jáne paıdalanýshylar úshin yńǵaılylyqty arttyrýǵa múmkindik beretin bıznes pen kúndelikti servısterge arnalǵan SuperApp derbes daýystyq assıstentter.

«Alageum Electric» dırektorlar keńesiniń tóraǵasy Erkebulan Іlııasov jańa býynnyń ıntellektýaldy elektr jelilerin qalyptastyrýǵa baǵyttalǵan Smart Grid sheshimderiniń keshenin kórsetti. Usynylǵan arhıtektýra generatsııa obektilerin, berý jáne taratý jelilerin, energııany saqtaý júıelerin, aqyldy qurylǵylardy jáne sońǵy tutynýshylardy birtutas tsıfrlyq ortaǵa biriktiredi. Sondaı-aq, transformatorlardy baqylaý júıesi jáne kún generatsııasyn boljaýǵa arnalǵan jasandy ıntellektige negizdelgen sheshimder usynylǵan. Tsıfrlyq qosalqy stansa men ilespe sheshimderdi engizý tehnıkalyq shyǵyndy 30%-ǵa, kommertsııalyq shyǵyndy 5-10%-ǵa tómendetýge, eń joǵary júktemeni 10-15%-ǵa tómendetýge, al JI-modelderdi boljaý dáldigin 95%-ǵa deıin jetkizýge múmkindik beredi.

Integratsııalyq protsesterge de nazar aýdaryldy. EEK-tiń Іshki naryqtar, aqparattandyrý, aqparattyq-kommýnıkatsııalyq tehnologııalar jónindegi alqa múshesi Varos Sımonıan B2B formatynda elektrondyq tsıfrlyq qoltańbany (ETsQ) tekserý servısi bar transshekaralyq elektrondyq qujat aınalymyn iske qosýdy usyndy, bul qujattardyń túpnusqalyǵyn naqty ýaqytta rastaýǵa jáne memleketaralyq ózara is-qımyl kezinde ákimshilik shyǵyndardy qysqartýǵa múmkindik beredi.

Startap-alleıada sondaı-aq AI Startify Incubator, Auezov AI First, Ushqyn AI Operator, AIJan jáne CortexAI jobalary usynyldy. Bul Qazaqstannyń ýnıversıtettik ázirlemelerden bastap memleket, bıznes, bilim berý jáne densaýlyq saqtaýǵa arnalǵan qoldanbaly servısterge deıingi ózindik JI-sheshimder ekojúıesin qalyptastyrý baǵyty baryn kórsetedi.

Aıta keteıik, Qazaqstan-Reseı arasynda qaı salalarda saýda aınalymyn arttyrý josparlanyp otyrǵanyn jazǵan edik.