«Digital Kazakhstan: zamanaýı bilim berý»: Tamyz sammıtine 500 myńnan astam bilim berý qyzmetkeri qatysty
ASTANA. KAZINFORM – Jańa oqý jylynyń bastalýyna arnalǵan dástúrli Tamyz basqosýy óz máresine jetti. Talqylaýdyń negizgi taqyryby oqý protsesin tsıfrlandyrýǵa jáne jasandy ıntellektti engizý erekshelikterine arnaldy.
Oqý-aǵartý mınıstri Ǵanı Beısembaev otandyq bilim berý júıesinde jasandy ıntellekti engizýdiń alǵysharttary qalyptasqanyn atap ótti. Búginde mektepterde joǵary jyldamdyqty ınternetpen qamtý 89% quraıdy, ınternettiń ortasha jyldamdyǵy ótken jylǵy 4 mbıt/s-ten bıyl 75 mbıt/s-ke jetti. Elimizdiń 1731 mektebinde Starlink jerserigi ornatylǵan.
«Jasandy ıntellekt tehnologııalaryn bilimge saýatty engizý – oqytýdyń tıimdiligin, jeke oqýshyǵa baǵyttylyǵyn qamtamasyz etedi, al bul óz kezeginde bilim sapasyn jaqsartýǵa múmkindik beredi. Zamanaýı tehnologııalar pedagogterden bilim berý protsesin uıymdastyrýda jańa ustanymdy talap etedi jáne ony tıimdi qoldanýǵa bilim berýdiń barlyq deńgeıleri daıyn bolýy kerek», - dedi mınıstr Nzarbaev ýnıversıtetinde ótken Tamyz sammıtinde.
Sonymen birge, mınıstr bilim berý ordalarynyń ınfraqurylymy jaqsarǵanyn atap ótti. Búginde elimizde 3 myńǵa jýyq mektep bir aýysymda bilim berýde. Qosymsha 536 oqýshy ornyna arnalǵan 302 mekteptiń qurylysy júrýde. 1,7 mıllıonnan astam oqýshy ystyq tegin tamaqpen qamtylǵan.
Sondaı-aq, Ǵanı Beısembaev kadrlyq áleýetti arttyrý máselesine toqtaldy. Onyń aıtýynsha, jyl saıyn muǵalim mamandyǵyna qyzyǵýshylyq bildirýshilerdiń qatary artyp keledi. Bıyl 1797 «Altyn belgi» ıegeri pedagogıka mamandyǵyn tańdaǵan, bul ótken jylmen salystyrǵanda 269 adamǵa kóp.
Mınıstr kelesi oqý jylynda basymdyq beriletin mańyzdy mindetterdi atap kórsetti. Bul – balalardyń qaýipsizdigin qamtamasyz etý, mektepterdiń ishki reglamenti men jarǵysynyń saqtalýy, bilim alýshylardyń oqý úlgerimi.
Plenarlyq otyrys halyqaralyq sarapshylardyń qatysýymen dıskýssııalyq formatta jalǵasty. Sonymen birge, taqyryptyq baǵyttar boıynsha plenarlyq sektsııalyq otyrystar ótti.
Sammıt aıasynda bilim berý salasyn jetildirý men damytý boıynsha tsıfrlyq sheshimderdiń sandyq kórmesi uıymdastyryldy. «Álem muǵalimi» jahandyq premııasynyń (Global Teacher Prize) ulttyq kezeńiniń jeńimpazdary tanystyryldy.
Sammıt sońynda Oqý-aǵartý mınıstri bilim berý salasynyń damýyna úles qosqan úzdik pedagogterdi vedomstvolyq nagradalarmen marapattady.
