Digital Bridge: Úzdik startap jobalar anyqtaldy
ASTANA. KAZINFORM — Elordada Ortalyq Azııadaǵy eń iri startap baıqaýy — Astana Hub Battle óz máresine jetti. Baıqaý tarıhynda alǵash ret birden alty joba jeńimpaz atandy jáne ár komanda 25 myń AQSh dollary kóleminde grant alady.
Baıqaý nátıjesinde Ticket to the Future nomınatsııasynda shaǵyn jáne orta bızneske arnalǵan jasandy ıntellekt negizindegi operatsııalyq júıeni ázirleıtin Moon.AI kompanııasy jeńiske jetti. Bul sheshim kompanııanyń derekterin jattap alyp, táýlik boıy jumys isteıtin daıyn «tsıfrlyq qyzmetker» bola alady.
Áleýmettik baǵyttaǵy úzdik startap bolyp JI negizinde oqýshylardyń kásibı baǵdarlanýyn jáne psıhologııalyq qoldaýyn qamtamasyz etetin WeGlobal.AI startaby úzdik atandy.
Seriktes atynan berilgen arnaıy nomınatsııada sport pen reabılıtatsııa úshin JI negizinde jumys isteıtin, kıiletin sensorlardy ázirleıtin Mirai Tech jobasy marapattaldy.
Óz kezeginde «Qazaqtelekom» grantyn stomatologııalyq klınıkalar men medortalyqtarǵa arnalǵan MacDent platformasy ıelendi.
«Jyl jańalyǵy» atalymynda Parkınson aýrýyn erte dıagnostıkalaýǵa arnalǵan MindShield mobıldi qosymshasy men bilezigi jeńimpaz boldy.
Sondaı-aq, Pavel Dýrovtyń arnaıy «Eksponentsıaldy ósim» nomınatsııasynda emtıhandarda kóshirýge tosqaýyl qoıýǵa kómektesetin TrustExam jobasy úzdik dep tanyldy.
Aıta keteıik, Pavel Dýrov jeńimpaz qazaqstandyq startapshydan sheberlik sabaǵyn alý keregin aıtqan edi.
Bıylǵy baıqaýǵa Qazaqstan, Ózbekstan, Ázerbaıjan jáne basqa elderden kelgen 80 startap ózderiniń ınnovatsııalyq jobalaryn tanystyrdy.