Digital Bridge óte mańyzdy pikir almasý alańyna aınaldy — Prezıdent

ASTANA. KAZINFORM – Bul týraly Memleket basshysy Qasym-Jomart Toqaev forýmnyń plenarlyq otyrysynda aıtty. 

— Digital Bridge 2025 halyqaralyq forýmyna qosh keldińizder! Eń aldymen, osy mańyzdy jıynǵa qatysý úshin arnaıy kelgen meımandarǵa shynaıy rızashylyǵymdy bildiremin.

Búgingi alqaly jıynǵa Majarstannyń Prezıdenti Joǵary Mártebeli Tamash Shýıoktiń qatysyp jatqanyn erekshe atap ótkim keledi. Qurmetti Prezıdent myrza, elimizge resmı saparmen kelip, forýmǵa qatysyp otyrǵanyńyzdy joǵary baǵalaımyn. Sizdiń ıdeıalaryńyz jáne bastamalaryńyz tsıfrlyq tehnologııa salasyndaǵy halyqaralyq seriktestikti nyǵaıta túsýge septigin tıgizedi dep senemin, — dedi Prezıdent.

Memleket basshysy Qazaqstan Eýrazııadaǵy negizgi tsıfrlyq hab retinde aldaǵy ýaqytta da osy mańyzdy jumysty jalǵastyra beretinin aıtty.

— Búginde Digital Bridge óte mańyzdy pikir almasý alańyna aınaldy, bul jerde jahandyq ózgerister men tsıfrlyq ekonomıkanyń bolashaǵy týraly ózekti oılar aıtylyp, mańyzdy bastamalar kóteriledi. Osy ýaqyt ishinde forým jumysyna 67 myńnan astam adam, 500-den asa ІT-kompanııa jáne 100 eldiń ókili qatysty. Qazaqstan Eýrazııadaǵy negizgi tsıfrlyq hab retinde aldaǵy ýaqytta da osy mańyzdy jumysty jalǵastyra beredi, — dedi Qasym-Jomart Toqaev.

Aıta ketelik Astanada Digital Bridge 2025 halyqaralyq tehnologııalyq forýmy bastalǵan edi.