Digital Bridge: Qazaqstandaǵy ınvestıtsııalar mindetti túrde ózin aqtaıdy
«Birneshe jyl buryn Qazaqstanǵa saparmen kelgen bolatynmyn. Sol kezde kóptegen kásipkerlermen kezdesip, óte utymdy birqatar ıdeıamen tanystym. Osy jolǵy saparymda Qazaqstandaǵy kásipkerliktiń aınalasynda ekojúıeni qurýdy jalǵastyrý úshin kelip otyrmyn. Sońǵy 6 jyl boıy álem elderine saıahattap, kásipkerlerge dáris oqyp, olardyń jahandyq jelisin damytýǵa úles qosýdamyn. Búginde Qazaqstanda kásipkerlerge jańa baǵyttardy ashýda múmkindikter mol ekenin baıqap otyrmyn. Atap aıtqanda, osy eldi damytý jolynda bıznes ókilderiniń alatyn orny erekshe. Qazaqstanda birneshe jas kásipkerlermen pikir almastym. Olardyń barlyǵy Qazaqstan bolashaǵyna ózderiniń úlesterin qosýǵa daıyn ekenin senimdi túrde aıtyp otyr», - dep toqtaldy Priceline Group negizin qalaýshy Djeff Hoffman.
Onyń paıymynsha, kásipkerlikke kiriserdiń aldynda túrli saladaǵy problemalardy sheshýge mán berý kerek.
«Kásipkerlik - ol jumys nemese kásip emes. Adamdardyń «men kásipker bolǵym keledi» dep aıtqany maǵan unamaıdy. Bul turǵyda adamdardan «men bul maqsat pen mindetterdi, problemalardy sheshkim keledi» degendi estigim keledi. Adamdardyń kóbisi tek shaǵymdanǵannan basqa eshteńe istemeıdi, al kásipker problemany sheshýge umtylady», - dedi D. Hoffman.
Óz kezeginde Unbound bas dırektory Denıel Sıel Qazaqstanda bıznes jobany iske qosýdyń áleýeti joǵary ekenin sóz etti. Eger jobany júzege asyrý durys bastalsa, ony TMD aýmaǵynda taratýǵa ekpin quıý qajet.
«Astana Hub boıynsha aıtatyn bolsaq, Bahreın men Sıngapýr úlgisi turǵysynda sýbsıdııalar men granttar kerek. Bul rette Úkimetpen únemi dıalog júrgizip turý qajet, ıaǵnı bul turǵyda memleket serpin berip otyrady. Ideıalar jeke sektordan tússe, memleket tarapynan qoldaý bolýy shart. Osy oraıda, memlekettik-jekeshelik áriptestik eń qolaıly qadam. Máselen, Sıngapýr úlgisindegi memlekettik-jekeshelik áriptestik táýekelderdi, bastamalardy jáne ıdeıalardy teńgerimdeýge bolatynyn kórsetip otyr. Atap aıtqanda, Qazaqstan Jibek jolynyń murageri ekeni belgili. Osy oraıda Qazaqstan Eýropa men Azııa arasyndaǵy tsıfrlyq kópirdi qurýǵa umtylyp jatyr. Negizi, bul bastamada ınvestorlardy tartýǵa múmkindigi joǵary, keıinnen osy ınvestıtsııalar mindetti túrde qaıtyp oralady», - dedi Denıel Sıel.
Budan buryn habarlanǵandaı, elordada Digital Bridge halyqaralyq ınnovatsııalyq forýmy ótip jatyr.
Forým aıasynda Hyperloop Transportation bas dırektory Dırk Alborn Qazaqstanda sońǵy býyndy tehnologııalarǵa negizdelgen fýtýrıstik poıyz jobasyn iske asyrýǵa nıetti ekenin atap ótti.