Digital Bridge: Hyperloop basshysy Qazaqstanǵa óziniń úzdik jobasymen kelmek

ASTANA. QazAqparat - Hyperloop Transportation bas dırektory Dırk Alborn kólik salasynda Qazaqstanda sońǵy býyndy tehnologııalarǵa negizdelgen fýtýrıstik poıyz jobasyn iske asyrýǵa nıetti. Bul týraly ol «Digital Bridge» halyqaralyq ınnovatsııalyq forýmy aıasynda tilshilerge bergen suhbatynda málim etti, dep habarlaıdy QazAqparat.

«Biz kóliktiń jańa túrin daıarlaýmen aınalysyp jatyrmyz. Máselen, kapsýlamen óte joǵary jyldamdyqta saıahattaý múmkindigi bar. Qazirgi kezde bul baǵyttaǵy jumystar boıynsha Qytaımen jáne Dýbaı qalasymen tıisti kelisimsharttardy bekittik. Sonymen qatar, ózge de eldermen birlese jumys isteýge daıynbyz. Búginde birqatar elderdiń úkimetterimen birlesken jumystardy bastap kettik. Jalpy bizde 14 joba bar», - dedi Dırk Alborn.

Osy oraıda, ol Qazaqstanda da aýqymdy jobalardy júzege asyrýǵa ázir ekenin atap ótti.

«Biz Qazaqstanda jumys isteýge nıettimiz. Bul turǵyda QR Úkimetimen sharalar josparyn pysyqtap alyp, barlyq zańdy negizderdi bekitý kerek. Atap aıtqanda, joba qurylysy kóptegen faktorlarǵa baılanysty. Shamamen, bul joldyń bir shaqyrymynyń quny 20 mln dollar. Alaıda eńbek resýrstaryna baılanysty Qazaqstanda jobanyń quny edáýir arzanǵa túsýi múmkin. Árbir eldiń ereksheligine qaraı tıisti esep-qısapty júrgizý qajet», - dep túıdi ol.

Aıta keteıik, Hyperloop - ol vakkýmdyq poıyz jobasy. Bul joba 2013 jyly amerıkalyq venchýrlyq kásipker Ilon Maskpen usynylǵan edi. Alaıda ol sońyna deıin júzege asyrylmady. Búginde synaq alańdary Hotornde jáne Las-Vegaste salyndy, sondaı-Týlýzde de synaq alańy qurastyrylyp jatyr. Atalǵan poıyzdyń jyldamdyǵy saǵatyna 457 shaqyrymǵa deıin jetedi eken.