Digital Bridge forýmyna demeýshiler qansha aqsha jumsaǵanyn aıta almaımyz — vıtse-mınıstr

ASTANA. KAZINFORM — Jasandy ıntellekt jáne tsıfrlyq damý vıtse-mınıstri Dosjan Musalıev Digital Bridge halyqaralyq forýmy kimniń esebinen uıymdastyrylǵany týraly pikir bildirdi.

— Halyqaralyq forýmy tolyqtaı demeýshilerdiń aqshasyna ótkizildi. Biz demeýshilermen qol qoıǵan ótinishter men kelisimder boıynsha bul aqparat jarııa etilmeıdi. Biraq ol tolyǵymen demeýshilik aqsha esebinen júzege asyrylǵanyn atap ótkim keldi, — dedi vıtse-mınıstr Úkimet otyrysynan keıin ótip jatqan baspasóz máslıhatynda.

Onyń sózinshe, forýmnyń qorytyndysy boıynsha 40-tan astam memorandýmǵa qol qoıylǵan.

Eske sala ketsek, 2–4 qazan kúnderi Astanada tehnologııalar men jasandy ıntellekt salasynda Digital Bridge halyqaralyq forýmy ótip jatyr. Bıyl aıtýly oqıǵa 30-dan astam elden kelgen 30 myńnan astam qatysýshy, júzden astam ınvestor men 400-den astam spıkerdiń basyn qosty. Barlyq shyǵyn demeýshilik qarajat esebinen jabylǵan. Digital Bridge forýmynda 130-dan astam startap usynylǵanyn jazǵan edik.