Digital Bridge 2023 forýmyn ótkizýge bıýdjetten qansha aqsha bólindi
Tsıfrlyq damý, ınnovatsııalar jáne aeroǵarysh ónerkásibi mınıstrligi Aqparattyq tehnologııalar salasyn damytý departamentiniń dırektory Ersultan Ermanov «Digital Bridge 2023» halyqaralyq tehnologııalyq forýmyn ótkizýge bıýdjetten qansha qarajat jumsalǵanyn aıtty, dep habarlaıdy Kazinform.
«Bıyl forýmdy ótkizýge bıýdjetten 200 mln teńgege jýyq qarjy bólindi. Sondaı-aq, demeýshilerdiń qarjysy tartyldy», - dedi ol ortalyq kommýnıkatsııalar qyzmetinde ótken brıfıngide.
Onyń sózinshe, forýmǵa shaqyrylǵan sheteldik qonaqtardyń kóbi jol men qonaqúı shyǵyndaryn ózderi kótergen.
«Qazirgi tańda sheteldik qonaqtarǵa qansha qarajat ketkenin aıtý qıyn, negizi. Kóbi óz aqshasyna keldi. Keıbir qonaqtarǵa ǵana qonaqúı men ushý shyǵyndary tólendi. Naqty san kerek bolsa, resmı túrde jazsańyz, naqty jaýap beremiz», - dedi departament basshysy.
Aıta keteıik, «Digital Bridge 2023» halyqaralyq tehnologııalyq forýmyn Memleket basshysy Qasym-Jomart Toqaev ashqan edi.
