Digital bazar jobasy: Bazarlardaǵy taýar aınalymy tsıfrlanady
ASTANA. KAZINFORM — Osy jyldyń sońyna deıin bazarlardy jańǵyrtý jumystary aıaqtalady. Saýda jáne ıntegratsııa mınıstrligi ekinshi deńgeıdegi banktermen bazarlardaǵy taýar aınalymyn tsıfrlandyrýǵa jáne olardyń aqsha aǵyndarynyń ashyqtyǵyn arttyrýǵa baǵyttalǵan «Digital bazar» jobasyn iske asyryp jatyr. Bul týraly sala mınıstri Arman Shaqqalıev baıandady.
Mınıstrlik zamanaýı saýda formattaryn damytýdy qolǵa aldy. Onda yntalandyrý mehanızmderi aıqyndaldy jáne tıisti zańnamalyq ózgerister qabyldandy.
− Іshki saýda sýbektilerin qoldaýǵa bıyl 5,2 mıllıard teńge qarastyrylǵan. Negizgi kapıtalǵa ınvestıtsııa tartý jumystary júrgizilýde. Saýda salasyndaǵy 33 nysannan turatyn, jalpy somasy 168,4 mıllıard teńgeni quraıtyn Jalpyulttyq ınvestıtsııalyq jobalar pýly qalyptastyryldy. Sondaı-aq, osy jyldyń sońyna deıin bazarlardy jańǵyrtý jumystaryn aıaqtaý josparlanǵan, − dedi A. Shaqqalıev Úkimettiń búgingi otyrysynda.
Oǵan qosa, mınıstr elektrondyq saýdany damytý týraly aıtyp berdi. Jarty jylda E-com 10% astam ósti jáne bólshek segmentte 1,5 trıllıon teńge berdi. Onyń 1,3 trıllıon teńgesi 6 iri marketpleıspen qamtamasyz etilgen (Kaspi.kz, Halyk market, Forte Jusan, Ozon, Wilberries).
Ekinshi jartyjyldyqta Qazposhtanyń mýltımodaldy ortalyqtar jelisiniń qurylysy bastaldy. Sondaı-aq, bıyl Qazaqstan-Qytaı (Kaspı jáne Qazposhta) baǵyty boıynsha kóterme elektrondyq platformany iske qosý josparlanýda.
- Jasyryn saýdany tómendetý baǵytynda taýarlardy katalogtaý jáne qadaǵalaý sharalary iske asyrylyp keledi. Zańnamalyq deńgeıde Taýarlardyń, jumystardyń jáne qyzmetterdiń jalpy jikteýishi engiziledi, tańbalanatyn taýarlardyń tizbesi keńeıtiledi. Qarjy mınıstrligimen jáne Qazaqtelekommen birlesip, Taýarlardyń ulttyq katalogy (TUK) jáne Elektrondyq taýarlardyń katalogtaryn (ETK) biriktirý aıaqtalýda. Ekinshi deńgeıdegi banktermen bazarlardaǵy taýar aınalymyn tsıfrlandyrýǵa jáne olardyń aqsha aǵyndarynyń ashyqtyǵyn arttyrýǵa baǵyttalǵan «Digital bazar» jobasy iske asyrylýda, − dedi Saýda mınıstri.
Aıta keteıik, elimizde jyl basynan beri taýar aınalymy 31 trln teńgeden asyp, saýda kólemi 8,4% ósti.