Digital Almaty aýqymyn keńeıtip, respýblıkalyq Digital Qazaqstan forýmy bolyp ótedi
ASTANA. KAZINFORM – 2026 jyly halyqaralyq Digital Almaty alańy respýblıkalyq Digital Qazaqstan forýmy bolyp transformatsııalanady. Bul týraly Jasandy ıntellekt jáne tsıfrlyq damý mınıstrliginiń baspasóz qyzmeti habarlady.
Bul – el ekonomıkasyn tsıfrlyq jáne AI-transformatsııalaý men óńirlerdi damytýǵa baǵyttalǵan ulttyq platforma.
Forýmnyń jańa formaty Qazaqstannyń turaqty tsıfrlyq ekonomıka qalyptastyrý, jasandy ıntellektini negizgi salalarǵa engizý jáne óńirlerdiń tehnologııalyq damýdaǵy rólin kúsheıtý jónindegi strategııalyq baǵytyn kórsetedi. Digital Qazaqstan elimizdiń ártúrli qalalarynda ótetin respýblıkalyq forým retinde josparlanǵan. Ol tsıfrlyq sheshimder men AI-tehnologııalardy naqty ekonomıka sektoryna, memlekettik basqarý júıesine jáne áleýmettik salaǵa tikeleı engizýge baǵyttalady.
Digital Qazaqstan 2026 forýmynyń negizgi taqyryby Industry 5.0 tóńireginde bolady. Industry 5.0 tujyrymdamasy adam men tehnologııanyń úılesimdi áriptestigine negizdeledi. Munda jasandy ıntellekt, derekter jáne robototehnıka ónimdilikti arttyrýdyń, ornyqty damýdyń jáne adam áleýetin kúsheıtýdiń negizgi quraldary retinde qarastyrylady.
Forým aıasynda memlekettik organdardyń ókilderi, bıznes qaýymdastyq, halyqaralyq korporatsııalar, ınvestorlar, tehnologııalyq kompanııalar, startaptar men sarapshylar bas qosyp, ónerkásipte, memlekettik basqarýda jáne óńirlik damýda tsıfrlyq jáne AI-sheshimderdi engizýdiń praktıkalyq stsenarıılerin talqylap, naqty keısterdi usynady.
– Digital Qazaqstan – keıingi jyldary elde júıeli túrde qalyptasyp kele jatqan tsıfrlyq ekojúıeniń jańa deńgeıi. Biz jekelegen keısterden aýqymdy ári júıeli tsıfrlyq transformatsııaǵa kóship otyrmyz. Bul úderiste óńirler ekonomıkalyq jáne tehnologııalyq damýdyń tolyqqandy draıverine aınalady. Forým tehnologııalar men jasandy ıntellektini ekonomıka men óńirlik protsesterge tereń ıntegratsııalaıtyn ulttyq platforma qalyptastyrady jáne el úshin uzaq merzimdi, ornyqty nátıjelerge jol ashady, - dedi Digital Bridge bas dırektory Danııa Ahmetova.
Digital Qazaqstan 2026 forýmy 2026 jylǵy 27 naýryzda ótedi. Forým alǵash ret Shymkent qalasynda uıymdastyrylady. Shymkent – óndiristik jáne ekonomıkalyq áleýeti joǵary, mańyzdy óńirlik ortalyq. Forýmnyń dál osy qalada ótýi naqty sektordy tsıfrlandyrý, ónerkásipke jasandy ıntellektini engizý jáne óńiraralyq tehnologııalyq yntymaqtastyqty nyǵaıtý máseleleri boıynsha mazmundy dıalog ornatýǵa múmkindik beredi.
Forým baǵdarlamasy tsıfrlyq jáne ındýstrııalyq damýdyń negizgi baǵyttaryn qamtıdy. Onyń aıasynda memleket ókilderi men halyqaralyq sarapshylar qatysatyn plenarlyq otyrys, salalyq paneldik sessııalar men dóńgelek ústelder, IT-kompanııalar men startaptardyń kórmesi, tehnologııalyq jarystar, baıqaýlar jáne hakatondar ótedi.
Forýmnyń jeke baǵyty – Digital Qazaqstan Awards ulttyq syılyǵy. Bul marapat tsıfrlyq jáne tehnologııalyq transformatsııadaǵy úzdik tájirıbelerdi moıyndaýǵa arnalǵan. 2026 jyly syılyqtar ónerkásiptegi AI-sheshimderdi engizý, tsıfrlyq memlekettik qyzmetterdi damytý, óńirlik tsıfrlyq transformatsııa, áleýmettik mańyzy bar tehnologııalyq jobalar jáne bolashaǵy zor AI-startaptar nomınatsııalary boıynsha tabystalady.
Forým uıymdastyrýshylarynyń qatarynda Qazaqstan Respýblıkasynyń Jasandy ıntellekt jáne tsıfrlyq damý mınıstrligi, Shymkent qalasynyń ákimdigi jáne «Astana Hab» avtonomdy klasterlik qory bar. Іs-shara demeýshilik qarajat esebinen ótkiziledi.
BAQ ókilderi úshin Digital Qazaqstan 2026 forýmyna akkredıtatsııa ashyq. Ótinimder 2026 jylǵy 9 naýryzǵa deıin qabyldanady. Akkredıtatsııadan ótý úshin tirkeý formasyn toltyrý qajet.
Eske sala keteıik, buǵan deıin QR PІB Injenerlik-tehnıkalyq ortalyǵy Digital Almaty 2025 forýmyna qatysqanyn jazǵan edik.
