Digital Almaty 2021: Ótken jyly qazaqstandyq servısterge DDoS-shabýyldar 44% artqan

NUR-SULTAN.QazAqparat – 2020 jyly Ótken jyly qazaqstandyq servısterge DDoS-shabýyldar sany 44% artqan. Bul týraly Almatyda ótken «Digital Almaty 2021 - Tsıfrlyq qaıta júkteý: jańa bolmysqa serpilis» halyqaralyq forýmynda málim boldy, dep habarlaıdy QazAqpartat.

«Memlekettik tehnıkalyq qyzmet» AQ baspasóz qyzmeti taratqan málimetterge qaraǵanda, epıdemıologııalyq jaǵdaıǵa baılanysty onlaın formatta ótken is-sharada QR Prezıdenti Qasym-Jomart Toqaev, Dúnıejúzilik Ekonomıkalyq forýmnyń prezıdenti Berge Brende, Google vıtse-prezıdenti Vınt Serf quttyqtaý sóz sóıledi.

Forým sheńberinde «Pandemııa kezeńindegi aqparattyq qaýipsizdikke syn–qaterler» paneldik sessııasy uıymdastyryldy. Onda «Memlekettik tehnıkalyq qyzmet» AQ Aqparattyq qaýipsizdiktiń ulttyq úılestirý ortalyǵy (AQUÚO) dırektorynyń orynbasary Aleksandr Kosenkov «2020 – Qaznettegi AQ: Tsıfrlar men faktiler» taqyrybymen spıker bolyp sóz sóıledi. Sondaı-aq, ol forýmǵa qatysýshylarǵa birneshe ózekti keısterdi tanystyrdy.

«Memlekettik tehnıkalyq qyzmet» AQ ókiliniń derekterinshe, ótken jyly Qazaqstanda aqparattyq qaýipsizdiktiń 24 053 ıntsıdenti tirkeldi jáne pysyqtaldy. Sondaı-aq fıshıngtik ınternet-resýrstar sany 58%, qazaqstandyq servısterge qatysty DDoS-shabýyldar 44% artty.

«Bul rette kóbinese memlekettik jáne kvazımemlekettik sektordyń, sondaı-aq aqparattyq-kommýnıkatsııalyq ınfraqurylymnyń asa mańyzdy obektileriniń (AKIAMO) osaldyqtaryn paıdalanýǵa 1 674 áreket jasaldy»,-deıdi Aleksandr Kosenkov.

Esterińizge sala keteıik, «Digital Almaty» osymen tórtinshi jyl qatarynan ótkizilip keledi jáne forýmnyń negizgi maqsaty tsıfrlyq transformatsııanyń jańa strategııalary men jańa tehnologııalar salasyndaǵy trendterdi talqylaý maqsatynda óńirlik jáne jahandyq deńgeıde dıalog júrgizý.