Digital Almaty 2021: Densaýlyq salasynda qoldanylatyn 2 joba tanystyryldy
«Digital Almaty-2021» halyqaralyq forýmynyń kún tártibinde pandemııa kezinde paıda bolǵan jańa syn-tegeýrinder men tsıfrlyq bastamalar talqylandy.
Almaty qalasynyń tsıfrlandyrý basqarmasy 2020 jyly koronavırýs ınfektsııasyna qarsy áreket etý úshin 15 jobany iske asyrǵan bolatyn, onyń ekeýi búgingi forýmda tanystyryldy.
Usynylǵan jobalar onokologııalyq aýrýlar men ıshemııalyq ınsýltty aldyn ala dıagnostıkalaý sekildi kúrdeli baǵyttardaǵy tar sheńberli dáriger mamandarynyń tájirıbelik qyzmetinde jasandy ıntellekttiń qoldanysyn kózdeıdi.
«Ǵorus Data» kompanııasy PACS – radıologııalyq túsirilimderdiń ortalyqtandyrylǵan medıtsınalyq arhıvin jasaýǵa baǵyttalǵan. Almaty – osy bastamany birinshi bolyp qoldaǵan óńir, qazirgi tańda osy júıemen Qazaqstannyń birneshe qalasy, atap aıtqanda Nur-Sultan, Taldyqorǵan, Taraz, Kókshetaý, Óskemen, Atyraý, Pavlodardyń 64 aýrýhanasy jumys isteıdi. Qondyrylǵan jasandy ıntellekttiń arqasynda dáriger shuǵyl qorytyndy shyǵarady.
Jasandy ıntellekttiń kómegimen kúrdeli aýytqýlar anyqtalǵan túsirilimderge avtomatty túrde joǵary qyzyl belgi qoıylady. Kelesi kezek aýytqýlary az jáne aýytqýlary joq túsirilimderge beriledi.
Jasandy ıntellekt arqyly óńdelgen túsirilimdi salystyrý úshin tikeleı túpnusqa sýretimen birge saqtalady. Anyqtalǵan aýytqýlar boıynsha karta jasalady. Servıs ókpe aýrýlarynyń, onyń ishinde pnevmonııa, týberkýlez, isinýdiń (onkologııa) eń jıi kezdesetin 14 belgisin anyqtaýǵa qabiletti. Nátıjesi avtomatty túrde dárigerdiń qatysýynsyz óńdelip, saqtalady.
Jasandy ıntellekt kómegimen patsıentke sol túsirilim jasalǵan kúni dıagnostıka jasaýǵa múmkindik beredi. Buǵan deıin nátıjıeni patsıentter 3-ten 14 kúnge deıin kútetin. Qazir PACS 84% dıagnostıka jasaý dáldigimen kúnine 300-ge jýyq rentgen túsirilimderin óńdeıdi.
«Almaty jasandy ıntellekt zerthanasy» ıshemııalyq ınsýltti erte anyqtaý úshin CEREBRA jobasynda jasandy ıntellektti paıdalanady.
Insýltti medıkamentozdy emdeýdiń terapevttik ýaqyty 4,5 saǵatty quraıdy, osy ýaqyt aralyǵynda dıagnozdy durys qoıyp, emdeý túrin tańdaý qajet. Terapevttik taldaý ýaqyty sheńberinde bas mıynyń zaqymdaný dárejesin anyqtap úlgerý múmkin bolsa, der kezinde emdi bastaıdy. Kóbinese ınsýlttiń damý satysyn anyqtaý úshin kopıýterlik tomografııa túsirilimderindegi surǵylt tonnan adam kóziniń ereksheligine baılanysty ondaǵy aıyrmashylyqty anyqtaý múmkin bolmaıdy, al jasandy ıntellekt ony 10 mınýtta jasaı alady.
Ishemııalyq ınsýltti anyqtaý úshin jasandy ıntellekttiń algorıtmi eń kúrdeli bolyp esepteletinin atap ótken jón, óıtkeni anyqtaýdyń joǵary dárejesine jetkender álemde kóp emes.
Almaty qalasynyń №7-shi qalalyq klınıkalyq aýrýhanasynyń bas dárigeri Manas Ramazanov aıtýynsha, mamannyń onkologııanyń nemese ıshemııalyq ınsýlttiń bastapqy satysyn anyqtaýǵa jetkilikti saraptamalyq qabileti nemese tájirıbesi jetpeýi múmkin.
«Al tsıfrlyq tehnologııa birden durys dıagnoz qoıyp, patsıentti mamandandyrylǵan medıtsınalyq mekemege shuǵyl jiberýge kómektesedi. Sondyqtan Qazaqstan boıynsha jasandy ıntellektti qoldanatyn jobalardyń aýqymyn keńeıtý óte mańyzdy»,- dedi dáriger.